दहिंवद गावानजीकची घटना; निष्काळजीपणे वाहन चालवल्याप्रकारणी दुचाकीस्वारावरच गुन्हा दाखल
अमळनेर (प्रतिनिधी): तालुक्यातील दहिंवद गावाजवळ जळगाव-गांधली मार्गावर चालणाऱ्या एका एसटी बसला समोरून येणाऱ्या भरधाव मोटारसायकलने जोरदार धडक दिली. या भीषण अपघातात दुचाकीस्वार रस्त्याच्या कडेला फेकला जाऊन गंभीर जखमी झाला आहे. याप्रकरणी बस चालकाने दिलेल्या फिर्यादीवरून निष्काळजीपणे वाहन चालवून अपघातास कारणीभूत ठरल्याबद्दल अज्ञात दुचाकीस्वाराविरुद्ध अमळनेर पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, ६ जुलै २०२६ रोजी रात्री ८:०० वाजेच्या सुमारास एसटी बस (क्रमांक MH 14 BT 2319) ही जळगाव बस स्थानकावरून अमळनेर तालुक्यातील गांधली येथे मुक्कामासाठी जाण्यास निघाली होती. दहिंवद गावाजवळील आश्रमशाळेजवळ बस चालकाने आपले वाहन रस्त्याच्या डाव्या बाजूने नियंत्रित वेगात चालवले होते. त्याच वेळी समोरून एक अज्ञात चालक त्याच्या ताब्यातील ‘हिरो’ कंपनीची ‘एच.एफ. डिलक्स’ मोटारसायकल (क्रमांक MH 18 BS 4768) अत्यंत भरधाव आणि निष्काळजीपणे चालवत आला. त्याने थेट बसच्या मागील बाजूच्या टायरजवळ जोरात धडक दिली.
धडक बसताच मोठा आवाज झाल्याने बस चालक विजय पाटील यांनी गाडी थांबवून खाली उतरून पाहिले. त्यावेळी मोटारसायकलस्वार रस्त्याच्या कडेला गंभीर जखमी अवस्थेत पडलेला दिसला आणि त्याची दुचाकीही बाजूला पडलेली होती. जखमी दुचाकीस्वाराने स्वतःच्या मोबाईलवरून नातेवाईकांना फोन केला, त्यानंतर थोड्याच वेळात तिथे आलेल्या एका चारचाकी वाहनातून त्याला उपचारासाठी रुग्णालयात पाठवण्यात आले. अपघातग्रस्त दोन्ही वाहने पोलिसांनी ताब्यात घेऊन पोलीस ठाण्यात लावली आहेत.
या अपघातप्रकरणी एसटी महामंडळाचे बस चालक फिर्यादी विजय बळीराम पाटील (वय ५५, रा. पिळोदे, ता. अमळनेर, जि. जळगाव) यांनी ७ जुलै रोजी दुपारी २:४३ वाजता अमळनेर पोलीस ठाण्यात तक्रार दिली.
त्यांच्या फिर्यादीवरून मोटारसायकल चालकाविरुद्ध अमळनेर पोलिसांत गुन्हा रजि. नं. ३४९/२०२६ नुसार भारतीय न्याय संहिता (BNS) चे कलम २८१, १२५(अ), (ब), ३२४(४) सह मोटार वाहन कायदा कलम १८४ प्रमाणे गुन्हा दाखल केला आहे. या गुन्ह्यात ‘ई-साक्ष’ प्रणालीचा वापर करण्यात आला आहे.
अमळनेर पोलीस ठाण्याचे पोलीस निरीक्षक दत्तात्रय निकम यांच्या मार्गदर्शनाखाली पोलीस हेड कॉन्स्टेबल संदेश पाटील पुढील तपास करत आहेत.
