मुक्ताईनगर तालुक्यातील पिंप्री नांदू रोडवर घटना
मुक्ताईनगर ( प्रतिनिधी ) – भरधाव वेगाने धावणाऱ्या आयशर गाडीमुळे झालेल्या भीषण अपघातात दोन जणांचा मृत्यू झाला असून एक जण गंभीर जखमी झाला आहे. ही घटना ४ मे २०२६ रोजी सकाळी सुमारे ८.१५ वाजता पिंप्री नांदू रोडवरील मरिमाता मंदिराजवळ घडली.
या प्रकरणी मुक्ताईनगर पोलीस ठाण्यात CCTNS क्र. १९१/२०२६ अन्वये भादंवि कलम १०५, १२५(अ), १२५(ब), २८१, ३२४(४) तसेच मोटार वाहन कायद्यानुसार गुन्हा दाखल करण्यात आला आहे.
अपघातात गजानन हिरामण पाटील (वय ४२) व अश्विनी गजानन पाटील (वय ३४, दोघेही रा. कोचूर, ता. रावेर) यांचा जागीच मृत्यू झाला. तर हेमांगी गजानन पाटील (वय अंदाजे दीड वर्ष) ही गंभीर जखमी झाली आहे.
मिळालेल्या माहितीनुसार, आरोपी चालकाच्या ताब्यातील RJ-11 GC-4306 क्रमांकाची आयशर गाडी रस्त्यावरून भरधाव वेगाने जात होती. गाडीच्या बॉडीमधून ३ ते ४ फूट बाहेर आलेले लोखंडी पट्टे योग्यरीत्या सुरक्षित न ठेवता वाहन चालवण्यात येत होते. याच लोखंडी पट्ट्यांचा धक्का समोरून येणाऱ्या मोटारसायकलस्वारांना बसल्याने हा भीषण अपघात घडला.
या धडकेत गजानन पाटील व अश्विनी पाटील यांचा मृत्यू झाला, तर लहान मुलगी हेमांगी गंभीर जखमी झाली. अपघातानंतर चालकाने घटनास्थळावरून पलायन केल्याची माहिती पोलिसांनी दिली आहे.
या प्रकरणी फिर्यादी दीपक हिरामण पाटील (वय ३७, व्यवसाय मजुरी, रा. कोचूर, ता. रावेर) यांनी दिलेल्या तक्रारीवरून गुन्हा दाखल करण्यात आला आहे.
घटनेचा पुढील तपास पोलीस निरीक्षक आशिष अडसूळ यांच्या मार्गदर्शनाखाली सपोनि राजेंद्र चाटे व पथक करत असून, फरार आरोपीचा शोध सुरू आहे.
