अमळनेर (प्रतिनिधी) : तालुक्यातील मुडी प्र. डांगरी येथे हातात तलवार घेऊन फिरत परिसरात दहशत निर्माण करणाऱ्या युवकाला मारवड पोलिसांनी ताब्यात घेतले असून त्याच्याकडील तलवार जप्त करण्यात आली आहे.
मुडी प्र. डांगरी येथे एक तरुण तलवार घेऊन फिरत असल्याची माहिती सहाय्यक पोलीस निरीक्षक जिभाऊ पाटील यांना मिळाली होती. त्यानुसार पोलीस कॉन्स्टेबल प्रवीण पाटील, पोलीस हेड कॉन्स्टेबल प्रवीण रमेश पारधी, पोलीस हेड कॉन्स्टेबल संजय वाल्मीक सूर्यवंशी व सहाय्यक फौजदार दीपक पाटील यांच्या पथकाने घटनास्थळी धाव घेतली.
यावेळी मुडी येथे एक तरुण हातात तलवार घेऊन उभा असल्याचे दिसून आले. तसेच त्याच्या काही अंतरावर ८ ते १० जणांचा जमाव उभा होता. पोलिसांनी तत्काळ कारवाई करत भूषण दिलीप बडगुजर (वय ३४, रा. मुडी) याला तलवारीसह ताब्यात घेतले.
याप्रकरणी मारवड पोलीस ठाण्यात शस्त्र अधिनियमांतर्गत गुन्हा दाखल करण्यात आला असून पुढील तपास पोलीस हेड कॉन्स्टेबल प्रवीण पारधी करीत आहेत.
