जळगाव शहरातील घाणेकर चौक परिसरातील घटना
जळगाव (प्रतिनिधी) : शहरातील ३६ वर्षीय तरुण हा औषध घेण्यासाठी घरून निघाला होता. घाणेकर चौकाजवळ असणाऱ्या चौबे विद्यालयाजवळ आला असताना अचानक चक्कर येऊन पडला. त्यात त्याला मार देखील लागला. शासकीय रुग्णालयात त्याला मयत घोषित करण्यात आले. याप्रकरणी शनिपेठ पोलीस स्टेशनला अकस्मात मृत्यूची नोंद करण्याचे काम सुरु होते.
धीरज सुधाकर सोनवणे (वय ३६, रा. मारोतीपेठ, जळगाव) असे मयत तरुणाचे नाव आहे. तो मारोतीपेठेत आई,वडील, पत्नी, १ मुलगा यांच्यासह राहत होता. भंडारी कन्स्ट्रक्शन येथे तो अकाउंटंट म्हणून काम करीत होता. त्यांची पत्नी या ७ महिन्यांची गरोदर असून त्या माहेरी गेल्या आहेत. धीरज हे सकाळी घरी असताना त्यांना ऍसिडिटीचा त्रास होऊ लागला. म्हणून ते औषध आणण्यासाठी गेले होते.
चौबे विद्यालयाजवळ आले असताना अचानक धीरजला चक्कर आली. त्यात तो जमिनीवर कोसळला. शासकीय वैद्यकीय महाविद्यालय व रुग्णालयात दाखल केले असता तेथे वैद्यकीय अधिकारी डॉ. माधुरी सोसे यांनी त्याला मयत घोषित केले. यावेळी कुटुंबीयांनी एकच आक्रोश केला. दरम्यान, घरात बाळाची चाहूल म्हणून आनंद असताना अचानक तरुण पित्याचा मृत्यू झाल्याने कुटुंबियांना धक्का बसला आहे. यामुळे हळहळ व्यक्त होत आहे.