पाचोरा तालुक्यातील मोंढाळा येथील घटना
जळगाव (प्रतिनिधी) :- पाचोरा तालुक्यातील मोंढाळे येथील शेतकऱ्याने कर्जबाजारीपणाला कंटाळून आत्महत्या करण्याचा प्रयत्न केला होता. तीन दिवस मृत्यूशी झुंज दिल्यावर त्याचा गुरुवारी दि. १२ डिसेंबर रोजी दुपारी ४.३० वाजता उपचारादरम्यान मृत्यू झाला आहे. याप्रकरणी जिल्हापेठ पोलीस स्टेशनला प्राथमिक अकस्मात मृत्यूची नोंद करण्याचे काम सुरु होते.
युवराज दशरथ जमादार (वय ४९, रा. मोंढाळे ता. पाचोरा) असे मयत शेतकऱ्याचे नाव आहे. ते गावात आई, पत्नी, २ मुली, १ मुलगा यांच्यासह राहत होते. शेती काम करून परिवाराचा उदरनिर्वाह करीत होते. मागील वर्षी त्यांच्या मोठ्या मुलीचा विवाह झाला आहे.(केसीएन) दरम्यान, त्यांच्यावर सोसायटीचे व बँकेचे कर्ज असल्याची माहिती नातेवाईकांनी दिली आहे. सातत्याने कर्ज फेडण्याच्या विवंचनेत ते राहत असल्याने त्यातूनच युवराज जमादार यांनी शेतातच सोमवारी दि. ९ डिसेंबर रोजी रात्री ९. ३० वाजता विषारी औषध घेऊन आत्महत्या करण्याचा प्रयत्न केला.
आजूबाजूच्या ग्रामस्थांनी युवराज यांना शासकीय वैद्यकीय महाविद्यालय व रुग्णालय, जळगाव येथे उपचारासाठी दाखल केले. तेथे तीन दिवस अतिदक्षता विभागात त्यांची मृत्यूशी झुंज सुरु होती. अखेर गुरुवारी दि. १२ रोजी दुपारी त्यांची ४.३० वाजता त्यांचा उपचारादरम्यान मृत्यू झाला.(केसीएन) यावेळी कुटुंबियांनी एकच आक्रोश केला. जिल्हापेठ पोलीस स्टेशनला प्राथमिक अकस्मात मृत्यूची नोंद करण्याचे काम सुरु होते. शेतकऱ्याच्या मृत्यूमुळे मोंढाळा गावात शोककळा पसरली असून त्यांच्या परिवाराला शासनाकडून मदत देण्याची मागणी ग्रामस्थांकडून होत आहे.
