उभ्या वाहनातून महागडे ऑडिओ साहित्य लंपास; अज्ञात चोरट्याविरुद्ध गुन्हा दाखल
जामनेर (प्रतिनिधी) : जामनेर शहरातील माळी समाज मंगल कार्यालयासमोर उभ्या असलेल्या वाहनातून साऊंड सिस्टीमचे सुमारे ८० हजार रुपये किमतीचे साहित्य अज्ञात चोरट्यांनी लंपास केल्याची घटना उघडकीस आली आहे. याप्रकरणी जामनेर पोलीस ठाण्यात चोरीचा गुन्हा दाखल करण्यात आला आहे.
पोलीसांनी दिलेल्या माहितीनुसार, नितीन विठ्ठल माळी (वय २५, रा. गणेशवाडी, ता. जामनेर) यांनी फिर्याद दिली आहे. त्यांच्या वाहनात ठेवलेली साऊंड सिस्टीम दि. २९ जुलै २०२६ रोजी दुपारी ३.३० ते दि. ३१ जुलै २०२६ रोजी दुपारी २ वाजेदरम्यान अज्ञात चोरट्याने चोरून नेली.
चोरी झालेल्या साहित्यामध्ये Sharp Audio SM-4000 (4 Channel), Sharp Audio SM-6000 (4 Channel), Marani Crossover, Numark M6 Mixer, MT-160 Amplifier, बॅटरी, वायर तसेच चार स्पीकर असा एकूण ८० हजार रुपयांचा मुद्देमाल आहे.
या प्रकरणी जामनेर पोलीस ठाण्यात भारतीय न्याय संहिता (BNS) कलम ३०३(२) अन्वये अज्ञात आरोपीविरुद्ध गुन्हा दाखल करण्यात आला आहे.
या गुन्ह्याचा पुढील तपास पोलीस नाईक रविंद्र देशमुख करीत आहेत.
