जळगाव फलाटावरील घटना, घटना सीसीटीव्हीत कैद
जळगाव (प्रतिनिधी) : येथील रेल्वे फलाटावर रेल्वे इंधनगाडी येत असतानाही लोहमार्ग ओलांडण्याच्या प्रयत्नात असलेल्या महिलेला वेगाने जात असलेल्या इंजिनाची धडक बसल्याची घटना मंगळवार, २७ रोजी घडली. यात ती महिला जबर जखमी झाली. विशेष म्हणजे फलाटावर कर्तव्यावर असलेल्या आरपीएफ कॉन्स्टेबल चांगो जिवराम चौधरी या महिलेसाठी देवदूत ठरला. कॉन्स्टेबल यांनी प्रसंगावधान राखत या महिलेचा जीव वाचवला. या जखमी महिलेला तातडीने स्ट्रेचरवरून रूग्णालयात उपचारार्थ दाखल करण्यात आले आहे. या घटनेचा व्हिडिओ सीसीटीव्हीत कैद झाला आहे.
जळगाव जंक्शन स्थानकावर मंगळवारी सकाळी साडे आठ वाजेच्या सुमारास एक महिला दोन नंबरच्या फलाटावरून तीन नंबरच्या फलाटावर येण्याचा प्रयत्नात होती. त्याच वेळी मुंबईकडून भुसावळकडे भरधाव वेगाने डिझेल इंधनाची वॅगन येत होती. फलाट ओलांडण्याच्या प्रयत्नात असलेल्या त्या महिलेचे येणाऱ्या वॅगनकडे लक्ष नसल्याने क्षणात जोरदार धडक बसली. (केसीएन)यात हवेच्या वेगाने ती महिला पाच ते सात फूट इंजिनाच्या दिशेने ओढली गेली. कर्तव्यावर असलेले रेल्वे सुरक्षा बलाचे कॉन्स्टेबल चांगो जिवराम चौधरी यांनी प्रसंगावधान राखून फलाटावर आडवे पडून या महिलेला ओढून जीवदान दिले.
तेथे उपस्थित असलेल्या रेल्वे पोलीस सुरक्षा पथकासह रेल्वे कर्मचाऱ्यांनी तातडीने स्ट्रेचरवरून शासकिय रूग्णालयात उपचारार्थ दाखल करण्यात आले. सदर घटना सीसीटीव्हीत कैद झाली आहे. प्रवाशांनी स्वत:च्या सुरक्षीततेसाठी आरपीएफ जवानांनी केलेल्या सूचनेकडे व रेल्वे प्रशासनाच्या नियमांचे काळजीपूर्वक पालन करावे, अशी प्रतिक्रिया निरीक्षक ज्ञानेश्वर पाटील यांनी दिली आहे.
