एरंडोल तालुक्यात जवखेडा बुद्रुक येथे घटना
एरंडोल (प्रतिनिधी):- तालुक्यातील जवखेडा बुद्रुक येथे शेतीच्या वहिवाटीच्या कारणावरून झालेल्या वादात एकाच कुटुंबातील चौघांनी पती आणि सासऱ्याला लाकडी काठीने व लाथाबुक्क्यांनी मारहाण केल्याची घटना घडली आहे. याप्रकरणी एरंडोल पोलीस स्थानकात गुन्हा दाखल करण्यात आला आहे.
जवखेडा बुद्रुक येथील रहिवासी रुपाली गोपाळ पाटील (वय ३८) यांनी याप्रकरणी फिर्याद दिली आहे. २६ मार्च रोजी दुपारी १:३० वाजेच्या सुमारास फिर्यादीच्या घरासमोर सार्वजनिक जागेत शेतीच्या वहिवाटीच्या जुन्या वादावरून ही बाचाबाची झाली. या वादाचे रूपांतर हाणामारीत झाले. आरोपी क्रमांक १ याने हातातील लाकडी काठीने फिर्यादीचे पती गोपाळ भारत पाटील आणि सासरे भारत मांगो पाटील यांना जबर मारहाण केली. तसेच इतर तीन आरोपींनी त्यांना चापटबुक्क्यांनी मारहाण करत शिवीगाळ व दमदाटी केली.
फिर्यादीनुसार पोलिसांनी संशयितांविरुद्ध गुन्हा नोंदवला आहे. यात परमेश्वर हिम्मत पाटील, महेंद्र हिम्मत पाटील, कुणाल परमेश्वर पाटील, साहिल परमेश्वर पाटील (सर्व रा. जवखेडा बु., ता. एरंडोल) यांचा समावेश आहे. या घटनेप्रकरणी एरंडोल पोलीस ठाण्यात गुन्हा दाखल करण्यात आला आहे. एरंडोल पोलीस स्टेशनचे पोलीस निरीक्षक निलेश गायकवाड यांच्या मार्गदर्शनाखाली तपास सुरू असून, पुढील तपास पोलीस हेड कॉन्स्टेबल मुकेश आमोदकर करत आहेत.
