पवन देसले यांच्याकडे पदभार
चोपडा ( प्रतिनिधी ) – येथील शहर पोलीस स्टेशनचे निरीक्षक मधुकर साळवे यांची जळगाव नियंत्रण कक्षात बदली करण्यात आली आहे. मंगळवारी गोतस्करी रोखणाऱ्या गोरक्षकांना साळवे यांनी अपमानित केल्याच्या आरोपावरून मोठा वाद निर्माण झाला होता, ज्याच्या पार्श्वभूमीवर जिल्हा पोलीस अधीक्षक महेश्वर रेड्डी यांनी हा आदेश निर्गमित केला आहे.
मंगळवारी चोपडा शहरात गोरक्षक आणि एका पोलिसावर जमावाने हल्ला केला होता. या घटनेच्या निषेधार्थ शहरात निषेध मोर्चा काढण्यात आला होता. यावेळी पोलीस निरीक्षक मधुकर साळवे आणि गोरक्षकांमध्ये शाब्दिक चकमक उडाली होती. साळवे यांनी दिलेल्या वागणुकीमुळे संतप्त झालेल्या जमावाने थेट चोपडा पोलीस ठाण्यात ठिय्या आंदोलन केले होते.
वाढता तणाव आणि कायदा व सुव्यवस्थेचा प्रश्न लक्षात घेता, जिल्हा पोलीस अधीक्षकांनी साळवे यांची तातडीने बदली केली आहे. त्यांच्या जागी आता जळगाव शहर वाहतूक शाखेचे पोलीस निरीक्षक पवन प्रतापराव देसले यांची नियुक्ती करण्यात आली असून त्यांनी आपला पदभार स्वीकारला आहे.
