विष घेतलेल्या शेतकऱ्याचा उपचारादरम्यान मृत्यू, भादली येथील घटना
जळगाव (प्रतिनिधी) :- तालुक्यातील भादली गावातील एका शेतकऱ्याने कर्जबाजारीपणाला कंटाळून विषारी औषध घेतल्याने त्यांचा उपचारादरम्यान बुधवारी दि. ३० ऑक्टोबर रोजी सकाळी ७ वाजता मृत्यू झाल्याची घटना घडली आहे. याप्रकरणी जळगाव तालुका पोलीस ठाण्यात अकस्मात मृत्यूची नोंद करण्यात आली आहे.
रवींद्र कौतिक पाटील (वय-५८, रा.भादली ता. जळगाव) असे मयत शेतकऱ्याचे नाव आहे. रविंद्र पाटील हे पत्नी मुलगा आणि दोन मुली यांच्यासह वास्तव्याला होते. शेती करून ते उदरनिर्वाह करत होते. गेल्या दोन ते तीन वर्षांपासून शेतातील सततची नापीकी आणि सोसायटीचे कर्ज घेतल्याने गेल्या काही दिवसांपासून ते विवंचनेत होते.(केसीएन) या कर्जबाजारीला कंटाळून त्यांनी शनिवारी २६ ऑक्टोबर रोजी शेतात असताना पिकावर फवारणी करण्याचे विषारी औषध प्राशन केले. ही घटना नातेवाईकांच्या लक्षात आल्यानंतर त्यांनी तातडीने जळगाव येथील शासकीय वैद्यकीय महाविद्यालयात उपचारासाठी दाखल केले.
त्यांच्यावर उपचार सुरू असताना अखेर बुधवारी दि. ३० ऑक्टोबर रोजी सकाळी ७ वाजता त्यांचा मृत्यू झाला. या संदर्भात जळगाव तालुका पोलीस ठाण्यात अकस्मात मृत्यूची नोंद करण्यात आली आहे. दरम्यान पुढच्या महिन्यात २२ डिसेंबर रोजी त्यांच्या मुलीचे लग्न होते, घरात आनंदाचे वातावरण असतांना त्यांनी आत्महत्या केल्याने त्यांच्या परिवारावर मोठा दुःखाचा डोंगर कोसळला आहे. दरम्यान, वधुपित्याने तथा शेतकऱ्याने आत्महत्या केल्यामुळे समाजमन विषण्ण झाले आहे.
