जामनेर तालुक्यातील नेरी शिवारातील घटना, पहूर येथे शोककळा
जामनेर (प्रतिनिधी) : तालुक्यातील पहूर कसबे येथील २७ वर्षीय तरुणाचा नोकरीवरून घरी जात असताना नेरी गावाजवळ जामनेर फाट्यापाशी कुत्रा आडवा आल्यामुळे दि. ३१ जुलै रोजी संध्याकाळी ७ वाजेच्या सुमारास भीषण अपघात होऊन त्यात तो गंभीर जखमी झाला होता. गुरुवारी दि. १ ऑगस्ट रोजी त्याचा उपचारादरम्यान मृत्यू झाला आहे. या प्रकरणी संबंधित पोलीस स्टेशनला एका अकस्मात मृत्यूची नोंद करण्याचे काम सुरू होते.
गणेश ज्ञानेश्वर बनकर (२७, रा. पहूर ता. जामनेर) असे मयत तरुणाचे नाव आहे. त्याच्या पश्चात पत्नी, ४ वर्षीय मुलगा, आई, वडील, भाऊ व दोन बहिणी असा परिवार आहे. पहूर कसबेतील रहिवासी व अल्पभूधारक शेतकरी ज्ञानेश्वर बाळकृष्ण बनकर यांचा चिरंजीव गणेश बनकर हा जळगाव येथे एका गॅस एजन्सीला कामाला आहे. (केसीएन)नेहमीप्रमाणे बुधवारी दि. ३१ जुलै रोजी सकाळी घरून दुचाकीने जळगावला गेला होता. संध्याकाळी कामावरून घरी परतत असताना सात वाजेच्या सुमारास जळगाव-छत्रपती संभाजी नगर रस्त्यावर नेरी येथे जामनेर फाट्याजवळ श्वानामुळे दुचाकीला अपघात झाला.
यात गणेश याच्या डोक्याला जबर दुखापत झाल्याने तो गंभीर जखमी झाला. त्याच्यावर जळगाव येथील खासगी रुग्णालयात उपचार सुरू होते. गुरुवारी दुपारी उपचारादरम्यान त्याचा मृत्यू झाला. यावेळी कुटुंबीयांनी एकच आक्रोश केला. मृतदेह पुढील कार्यवाहीसाठी शासकीय वैद्यकीय महाविद्यालय व रुग्णालयात आणण्यात आला होता. घटनेची संबंधित पोलीस स्टेशनला नोंद करण्याचे काम सुरू होते.
