जळगावात शंकरराव नगरात शनिपेठ पोलिसांकडून तिघांना अटक
जळगाव (प्रतिनिधी) :- शहरातील शंकरराव नगरात एक कॉलेजजवळ अवैधपणे सुरू असलेल्या कुंटणखान्यावर शनिपेठ पोलिसांनी छापा टाकून तीन महिलांची सुटका केली आहे. यात कुंटणखाना चालविणाऱ्या दाम्पत्यासह तिघांना अटक केली आहे. त्यांच्यावर शनीपेठ पोलीस ठाण्यात गुन्हा दाखल करण्यात आला आहे.
शहरातील शंकरराव नगर परिसरात एका कॉलेजजवळ अविनाश गोवर्धन रडे, माधुरी अविनाश रडे(दोन्ही रा. शंकरराव नगर, जळगाव), शरद कौतिक कोळी (रा. रामेश्वर कॉलनी, जळगाव) हे तिघे जण कुंटणखाना चालवित असल्याची माहिती शनिपेठ पोलीस ठाण्याचे पोलीस निरीक्षक रंगनाथ धारबळे यांना मिळाली.(केसीएन)तशी परिसरातील नागरिकांनी तक्रार देखील केली होती. त्यानुसार त्यांनी पोलिस पथकाला कारवाई करण्याच्या सूचना दिल्या. शनिपेठ पोलिसांनी गुरुवारी दुपारी ४ वाजता या ठिकाणी सापळा रचला. सुरुवातीला डमी गिऱ्हाईक पाठवून खात्री केली. त्यानुसार पोलिसांनी तातडीने छापा टाकला.
या कारवाईत कुंटणखाना चालणाऱ्या रडे दांपत्यासह शरद कोळी यांच्यासह तिघांना ताब्यात घेऊन अटक करण्यात आली आहे. त्यानंतर येथील ३ पीडित महिलांची सुटका करण्यात आली. पोलीस उपनिरीक्षक योगेश ढिकले, पोलीस हेड कॉन्स्टेबल विजय खैरे, इंदल जाधव, पोलिस कॉन्स्टेबल विक्की इंगळे, अमोल वंजारी, अनिल कांबळे, निलेश घुगे, काजल सोनवणे यांनी कारवाई केली. पोलीस ठाण्यात गुन्हा दाखल करण्यात आला आहे.
