मुक्ताईनगर तालुक्यातील पिंप्रीपंचम येथील घटना
मुक्ताईनगर (प्रतिनिधी) : लहान भावाने मोठ्या भावाला पैसे मागितल्याच्या कारणावरून दोघांमध्ये मोठा वाद झाला. या वादाचे पर्यावसन हाणामारीत होऊन नंतर लहान भावाने मोठ्या भावाला भला मोठा दगड मारला. यात शारीरिक व अंतर्गत रक्तस्त्राव झाल्यामुळे मोठा भाऊ गंभीर जखमी झाला होता. दरम्यान, उपचारासाठी मुंबई येथे नेत असताना रस्त्यातच त्याचा मृत्यू झाला. या प्रकरणी मुक्ताईनगर पोलीस स्थानकात मयत मोठ्या भावाच्या मुलाने दिलेल्या फिर्यादीवरून गुन्हा दाखल करण्यात आला आहे. तालुक्यातील पिंप्रीपंचम येथे ही घटना घडली आहे.
मुखा मानकु शिंदे (वय ४५, रा. पूर्णाड ता. मुक्ताईनगर) असे मयत इसमाचे नाव आहे. गावात तो त्याच्या परिवारासह राहतो. दरम्यान त्याचा लहान भाऊ पंढरी शिंदे (वय ४०) हा काही दिवसांपासून त्याला पैसे मागत असल्याची माहिती मिळाली आहे. मात्र मोठा भाऊ मयत मुखा शिंदे यांनी त्याला वेळोवेळी नकार दिला आहे. दरम्यान १० ऑगस्ट रोजी संध्याकाळी साडेसहा ते साडेसात वाजेच्या दरम्यान दोघांमध्ये पुन्हा पैसे मागितल्याच्या कारणावरून वाद झाला. हा वाद पिंप्री पंचम गावातील भागवत धनु यांच्या शेतामध्ये झाला.
यावेळी दोघांमध्ये हाणामारी झाली. हाणामारीचे रूपांतर गंभीर होत लहान भाऊ पंढरी शिंदे यांनी त्याला भला मोठा दगड मारून टाकला. यामुळे तो गंभीर जखमी झाला. आजुबाजूच्या लोकांनी धाव घेत त्यांचे भांडण सोडवले. जखमी मुखा शिंदे यांना दवाखान्यात हलविले. मात्र मार गंभीर असल्यामुळे त्याला मुंबई येथे मोठ्या दवाखान्यात हलवण्यासाठी सांगण्यात आले. तेथून मुंबई येथे जात असताना उपचारादरम्यान मुखा शिंदे यांचा मृत्यू झाला आहे.
दरम्यान मुक्ताईनगर पोलिसांना घटनेची माहिती मिळताच त्यांनी घटनास्थळी धाव घेतली. त्यांनी ग्रामस्थांशी चर्चा करीत तपास केला. त्यानंतर मयत मुखा शिंदे यांचा मुलगा दगडू मुखा शिंदे (वय २०) याच्या फिर्यादीवरून खूनाचा गुन्हा दाखल केला असून संशयित आरोपी पंढरी शिंदे याला अटक करण्यात आली आहे. तपास सपोनी संदीप दूनगहू यांच्या मार्गदर्शनाखाली पोलीस उपनिरीक्षक संदीप चेडे करीत आहेत.
