चालक पोलिसांना पाहताच ट्रॅक्टर सोडून पसार; ४ लाख २४ हजार २३० रुपयांचा मुद्देमाल जप्त
जळगाव (प्रतिनिधी) – जळगाव तालुका पोलिसांनी अवैध गौण खनिज वाळू वाहतुकीविरुद्ध कारवाई करत खेडी खुर्द फाट्याजवळून वाळू वाहतूक करणारे ट्रॅक्टर व ट्रॉली जप्त केली. या कारवाईत सुमारे २४ हजार २३० रुपये किमतीची एक ब्रास गौण खनिज वाळू तसेच सुमारे ४ लाख रुपये किमतीचे स्वराज कंपनीचे ट्रॅक्टर व ट्रॉली असा एकूण ४ लाख २४ हजार २३० रुपयांचा मुद्देमाल पोलिसांनी हस्तगत केला.
पोलिसांनी दिलेल्या माहितीनुसार, ६ ऑक्टोबर २०२६ रोजी मध्यरात्री सुमारे १.३० वाजता खेडी खुर्द फाट्याजवळ रस्त्यावर निळ्या रंगाचे स्वराज कंपनीचे ७४४ एफई मॉडेलचे, विनाक्रमांकाचे ट्रॅक्टर आणि त्यास जोडलेली निळ्या रंगाची एमएच-१९-एएन-६०३९ क्रमांकाची ट्रॉली आढळून आली. सदर ट्रॅक्टरमधून कोणताही शासकीय परवाना नसताना गौण खनिज वाळूची वाहतूक केली जात असल्याचे पोलिसांच्या निदर्शनास आले.
पोलिसांना पाहताच ट्रॅक्टरवरील चालकाने वाहन जागेवरच सोडून पळ काढला. चालकाचे नाव व गाव समजू शकले नाही.
याप्रकरणी पोलीस हवालदार योगेश देविदास पाटील यांच्या फिर्यादीवरून जळगाव तालुका पोलीस ठाण्यात CCTNS गुन्हा क्रमांक ३०९/२०२६ नुसार भारतीय न्याय संहिता २०२३ चे कलम ३०३ (२) तसेच गौण खनिजे विकास व विनियमन अधिनियम कलम २१ आणि जमीन महसूल अधिनियम १९६६ चे कलम ४८ (७), (८) अन्वये गुन्हा दाखल करण्यात आला आहे.
या प्रकरणाचा पुढील तपास पोलीस नाईक कैलास नारायण इंगळे करीत असून, आरोपी ट्रॅक्टर चालक व मालकाचा शोध सुरू आहे. कारवाई जळगाव तालुका पोलीस ठाण्याचे पोलीस निरीक्षक शशिकांत पाटील यांच्या मार्गदर्शनाखाली करण्यात आली.
