पारोळा शहरातील घटना
पारोळा (प्रतिनिधी) :- शहरातील गणेश भोजनालयसमोर भरधाव वेगाने येणाऱ्या कारने दुचाकीला जोरदार धडक दिल्याने दुचाकीस्वारचा जागीच मृत्यू झाल्याची घटना सोमवारी दि. ४ नोव्हेंबर रोजी रात्री १० वाजता घडली आहे. याप्रकरणी पारोळा पोलीस स्टेशनला गुन्हा दाखल करण्यात आला आहे.
प्रशांत राजकुमार नागदेव (वय ३४ रा. पारोळा) असे मयत दुचाकीस्वाराचे नाव आहे. पारोळा येथील लक्ष्मी मोबाईलचे संचालक राजकुमार नागदेव यांचे लहान चिरंजीव प्रशांत उर्फ गोलु नागदेव हा सोमवारी दि. ४ नोव्हेंबर रोजी रात्री १० च्या सुमारास महामार्गावरून दुचाकी क्रमांक (एम एच १९ डि डब्ल्यू ८२७४) ने घरी जात होता. शहरातील गणेश भोजनालय समोर मागुन येणाऱ्या कार क्रं (एमएच ५४ बी ०६७२) हिने त्याच्या दुचाकीला जोरदार धडक दिल्याने रस्त्यावर कोसळून त्यांचा जागीच मृत्यू झाला.
याबाबत पारोळा पोलीस स्टेशनला त्याचे मोठे बंधू सन्नी नागदेव यांनी दिलेल्या फिर्यादीवरून अज्ञात कार चालक (नाव गाव माहित नाही) याचा विरोधात पारोळा पोलीस ठाण्यात गुन्हा दाखल करण्यात आला. अपघात घडल्यानंतर कारचालक आपली कार तिथेच सोडून फरार झाला आहे. या घटनेमुळे पारोळ्यातील नागरिक संतप्त झाले होते. पोलीस तपास करीत आहेत.
