जामनेर तालुक्यातील गारखेडा येथील घटना
जामनेर (प्रतिनिधी) :- घरासमोर कचरा टाकण्याच्या कारणावरून झालेल्या वादातून एका व्यक्तीला मारहाण करून जखमी केल्याप्रकरणी जामनेर पोलीस ठाण्यात पाच जणांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, २८ जून रोजी सकाळी ११ वाजेच्या सुमारास गारखेडा गावात ही घटना घडली. फिर्यादी सुरज शांताराम चौधरी (वय ३२, व्यवसाय मजुरी, रा. गारखेडा, ता. जामनेर) यांच्या घरासमोर कचरा टाकण्याच्या कारणावरून वाद झाला.
याप्रकरणी निलेश हरिदास चौधरी, साई निलेश चौधरी, नैतिक निलेश चौधरी, विद्या निलेश चौधरी आणि कल्पनाबाई हरिदास चौधरी (सर्व रा. गारखेडा बु., ता. जामनेर) यांच्याविरुद्ध गुन्हा दाखल करण्यात आला आहे.
तक्रारीनुसार, आरोपींनी फिर्यादीला चाकू व फायटरने मारहाण करून जखमी केले. तसेच फिर्यादीच्या पत्नीला देखील लाथाबुक्क्यांनी मारहाण करण्यात आल्याचे तक्रारीत नमूद करण्यात आले आहे.
या प्रकरणी भारतीय न्याय संहिता (बीएनएस) कलम ११८(१), ११५(२), १८९(२), १९१(२) आणि १९० अन्वये गुन्हा दाखल करण्यात आला असून, पुढील तपास पोलीस हवालदार गजानन काळे करीत आहेत. वृत्त लिहीपर्यंत कोणालाही अटक करण्यात आलेली नव्हती.
