चाळीसगाव शहरातील मध्यरात्रीची घटना; खुनाच्या प्रयत्नाचा गुन्हा दाखल, पोलिसांची तातडीने कारवाई
चाळीसगाव ( प्रतिनिधी ) – चाळीसगाव शहरात जुन्या वादाच्या रागातून एका २६ वर्षीय तरुणावर लोखंडी कटरने जीवघेणा हल्ला केल्याची धक्कादायक घटना घडली आहे. या प्रकरणी चाळीसगाव शहर पोलीस ठाण्यात खुनाच्या प्रयत्नाचा गुन्हा दाखल करण्यात आला असून दोन्ही आरोपींना पोलिसांनी काही तासांतच अटक केली आहे.
पोलिसांनी दिलेल्या माहितीनुसार, १८ जुलै २०२६ रोजी मध्यरात्री १२.३७ वाजेच्या सुमारास चाळीसगाव शहरातील नगरपालिका शाळा क्रमांक ११ जवळील रस्त्यावर ही घटना घडली. फिर्यादी प्रतिक शाम गोल्हार (वय २६, रा. पवारवाडी, कलाल गल्ली, स्टेशन रोड, चाळीसगाव) यांच्यावर शुभम मधुकर पाटील आणि अमीर उर्फ बबडी निसार शेख (दोघेही रा. चाळीसगाव) यांनी हल्ला केला.
सुमारे चार महिन्यांपूर्वी झालेल्या किरकोळ वादाचा राग मनात धरून आरोपींनी फिर्यादीला अडवून लोखंडी कटरने जीव घेण्याच्या उद्देशाने सलग वार केले. तसेच दोघांनी मिळून मारहाणही केली. या हल्ल्यात फिर्यादी जखमी झाला असून त्याच्यावर उपचार सुरू आहेत.
घटनेची माहिती मिळताच चाळीसगाव शहर पोलिसांनी तातडीने तपास सुरू केला. भारतीय न्याय संहिता (BNS) कलम १०९, ११५(२), ३५२, ३५१(३), ३(५) अन्वये गुन्हा दाखल करण्यात आला. तपासादरम्यान दोन्ही आरोपींना १८ जुलै २०२६ रोजी रात्रीच अटक करण्यात आली.
या प्रकरणाचा पुढील तपास पोलीस उपनिरीक्षक भरत दाते यांच्या मार्गदर्शनाखाली सुरू असून, आरोपींकडून अधिक चौकशी केली जात आहे.
