जामनेर येथे ९१ हजारांचे डी.आय. पाईप चोरी
बोदवड रस्त्यावरील शेताजवळील घटना, अज्ञाताविरुद्ध गुन्हा दाखल
जामनेर: शहरातील जामनेर-बोदवड रस्त्यावरील ग्रीनलँड नर्सरीसमोरील शेताजवळ ठेवलेले ९१ हजार रुपये किमतीचे जिंदाल कंपनीचे डी.आय. पाईप अज्ञात चोरट्यांनी लांबवल्याची घटना उघडकीस आली आहे. या प्रकरणी जामनेर पोलीस ठाण्यात अज्ञात चोरट्याविरुद्ध चोरीचा गुन्हा नोंदवण्यात आला आहे.
पोलीस सूत्रांकडून मिळालेल्या सविस्तर माहितीनुसार, श्रीरामपेठ (ता. जामनेर, जि. जळगाव) येथील रहिवासी असलेले इंजिनिअर निशांत किशोर चव्हाण (वय २८) यांच्या ताब्यातील हे पाईप बोदवड रस्त्यावरील शेताजवळील मोकळ्या जागेत ठेवण्यात आले होते. २३ जुलै २०२६ रोजी सायंकाळी सहा वाजेपासून ते २४ जुलै २०२६ रोजी सायंकाळी चार वाजेच्या कालावधीत अज्ञात चोरट्याने या मोकळ्या जागेतून जिंदाल कंपनीचे १४ नग डी.आय. पाईप चोरून नेले.
चोरीला गेलेले हे पाईप १०० एमएम व्यासाचे आणि ५.५ मीटर लांबीचे, काळ्या रंगाचे होते. प्रत्येक पाईपची किंमत ६ हजार ५०० रुपये असून एकूण ९१ हजार रुपयांचा हा माल अज्ञात चोरट्याने लबाडीच्या इराद्याने लांबवला. हा प्रकार लक्षात आल्यानंतर निशांत चव्हाण यांनी २४ जुलै रोजी रात्री ९.२८ वाजेच्या सुमारास जामनेर पोलीस ठाण्यात फिर्याद दिली.
या फिर्यादीवरून जामनेर पोलिसांत गुन्हा नोंद क्रमांक ३४४/२०२६ नुसार भारतीय न्याय संहितेच्या (BNS) कलम ३०३(२) अन्वये चोरीचा गुन्हा दाखल करण्यात आला आहे. घटनेची माहिती मिळताच जामनेर पोलीस ठाण्याचे पोलीस निरीक्षक मुरलीधर कासार यांनी घटनास्थळाची पाहणी केली. या प्रकरणाचा पुढील तपास पोलीस नाईक रवींद्र देशमुख करत असून संशयित आरोपींचा शोध सुरू आहे.
