दोन जणांविरुद्ध गुन्हा दाखल
जळगाव (प्रतिनिधी):- शहरात मानवी आरोग्यास घातक असलेल्या प्रतिबंधित अन्नपदार्थांची विक्री करणाऱ्यांविरुद्ध प्रशासनाने कडक पाऊल उचलले आहे. रामानंद नगर पोलीस स्टेशनच्या हद्दीत अन्न व औषध प्रशासनाने छापा टाकून हजारो रुपये किमतीचा सुगंधी तंबाखू आणि पानमसाल्याचा साठा जप्त केला आहे. याप्रकरणी दोन संशयितांविरुद्ध गुन्हा दाखल करण्यात आला आहे.
मंगळवार, २१ एप्रिल रोजी सायंकाळी ४:३० वाजेच्या सुमारास जळगाव येथील शामाफायर कॉम्प्लेक्स जवळील ‘प्लांट नंबर ०५’ परिसरात प्रतिबंधित गुटखा आणि तंबाखूची साठवणूक व विक्री होत असल्याची माहिती मिळाली होती. या माहितीच्या आधारे अन्न सुरक्षा अधिकारी पंकज सुनील कढरे (वय २८) यांनी सहकाऱ्यांसह छापा टाकला.
या कारवाईत पोलिसांनी १ लाख ४८० रुपयांचा मुद्देमाल जप्त केला आहे. हा सर्व साठा मानवी आरोग्यास अपायकारक असल्याने तो जप्त करण्यात आला आहे. या प्रकरणी पोलिसांनी दोन व्यक्तींविरुद्ध गुन्हा दाखल केला आहे. लखन लक्ष्मणदास हिराणी (वय २८, रा. सिंधी कॉलनी, जळगाव), नरेश लक्ष्मणदास हिराणी (वय ३२, रा. सिंधी कॉलनी, जळगाव) या संशयितांनी गुन्ह्याचे उल्लंघन केले आहे.
याप्रकरणी रामानंद नगर पोलीस स्टेशनमध्ये गुन्हा नोंदवण्यात आला असून, पुढील तपास पोलीस निरीक्षक राजेंद्र गुंजाळ यांच्या मार्गदर्शनाखाली सुरू आहे. अद्याप याप्रकरणी कोणालाही अटक करण्यात आलेली नाही. जळगाव पोलीस आणि अन्न व औषध प्रशासनाच्या या धडक कारवाईमुळे अवैध गुटखा विक्रेत्यांचे धाबे दणाणले आहेत.
