कुसुंबा परिसरात सापळा रचून अटक; २० हजारांचा गावठी कट्टा जप्त
जळगाव (प्रतिनिधी) – जळगाव एमआयडीसी पोलिसांनी अवैध शस्त्र बाळगणाऱ्यांविरुद्ध धडक कारवाई करत गावठी कट्टा बाळगून फिरणाऱ्या एका तरुणाला अटक केली आहे. आरोपीकडून २० हजार रुपये किमतीचे गावठी पिस्तूल जप्त करण्यात आले असून त्याच्याविरुद्ध भारतीय शस्त्र अधिनियम आणि महाराष्ट्र पोलीस अधिनियमान्वये गुन्हा दाखल करण्यात आला आहे.
एमआयडीसी पोलीस ठाण्याचे पोलीस उपनिरीक्षक चंद्रकांत धनके यांना गोपनीय माहितीदारामार्फत जळगाव विमानतळासमोरील कुसुंबा परिसरातून धानवडकडे जाणाऱ्या रस्त्यावर एक तरुण गावठी कट्टा घेऊन फिरत असल्याची माहिती मिळाली. त्यांनी तत्काळ वरिष्ठ अधिकाऱ्यांना माहिती दिल्यानंतर पोलीस निरीक्षकांच्या आदेशानुसार विशेष पथक तयार करून सापळा रचण्यात आला.
पोलीस पथकाने घटनास्थळी धाव घेत संशयिताला ताब्यात घेतले. चौकशीत त्याने आपले नाव गणेश श्रावण सोनवणे (वय २४, रा. कुसुंबा, ता. जि. जळगाव)*असे सांगितले. त्याची अंगझडती घेतली असता जीन्स पँटच्या कमरेला खोसलेला एक गावठी कट्टा आढळून आला.
पंचांसमक्ष सदर गावठी पिस्तूल जप्त करण्यात आले. या प्रकरणी एमआयडीसी पोलीस ठाण्यात गुन्हा क्रमांक ५७९/२०२६** दाखल करण्यात आला असून आरोपीविरुद्ध भारतीय शस्त्र अधिनियम तसेच महाराष्ट्र पोलीस अधिनियमान्वये कारवाई करण्यात आली आहे. या प्रकरणाचा पुढील तपास पोलीस हेडकॉन्स्टेबल रामकृष्ण पाटील करीत आहेत.
ही कारवाई पोलीस अधीक्षक श्रीकांत धिवरे* अपर पोलीस अधीक्षक संदीप गावीत, उपविभागीय पोलीस अधिकारी नितीन गणापुरे आणि एमआयडीसी पोलीस निरीक्षक बबन आव्हाड** यांच्या मार्गदर्शनाखाली पोलीस उपनिरीक्षक चंद्रकांत धनके तसेच त्यांच्या विशेष पथकाने यशस्वीरीत्या पार पाडली.
