८ लाख ५० हजारांचा ऐवज लंपास
जळगाव (प्रतिनिधी) – रक्षाबंधनच्या सणाची लगबग सुरू असतानाच जळगाव शहरातील रामेश्वर कॉलनीत घरफोडीची घटना घडली. कुटुंबीय बाहेर गेले असताना अज्ञात चोरट्याने बंद घराचे कुलूप व कडी-कोयंडा तोडून घरातील सुमारे ८ लाख ५० हजार रुपयांचा ऐवज लंपास केला. या घटनेमुळे परिसरात खळबळ उडाली आहे.
या प्रकरणी संगितत धुगे रामेश्वर कॉलनी,जळगाव) यांनी एमआयडीसी पोलीस ठाण्यात फिर्याद दिली आहे.
२७ ऑगस्ट रोजी रात्री साडेतीन वाजेपासून २८ ऑगस्ट रोजी पहाटे साडेतीन वाजेपर्यंतच्या कालावधीत अज्ञात चोरट्याने बंद घराचा कडी-कोयंडा तोडून घरात प्रवेश केला. घरातील कपाट उघडून त्यामधील सोन्याचे दागिने आणि रोकड चोरून नेल्याचे फिर्यादीत नमूद करण्यात आले आहे.
चोरीस गेलेल्या ऐवजामध्ये सुमारे ७ लाख रुपये किमतीचे १४० ग्रॅम वजनाचे सोन्याचे दागिने तसेच १ लाख ५० हजार रुपये रोकड असा एकूण ८ लाख ५० हजार रुपयांचा ऐवज असल्याचे तक्रारीत नमूद करण्यात आले आहे.
चोरीची बाब लक्षात आल्यानंतर कुटुंबीयांनी तत्काळ पोलिसांना माहिती दिली. पोलिसांनी घटनास्थळी पाहणी करून पंचनामा केला असून, अज्ञात चोरट्याचा शोध सुरू केला आहे.
या प्रकरणी अज्ञात चोरट्याविरुद्ध एमआयडीसी पोलीस ठाण्यात फिर्याद दाखल करण्यात आली असून, चोरीचा तपास सुरू आहे.
रक्षाबंधनाच्या पार्श्वभूमीवर कुटुंबीय बाहेर गेले असतानाच घरफोडी झाल्याने नागरिकांमध्ये चिंता व्यक्त होत आहे. परिसरातील सीसीटीव्ही फुटेज तसेच अन्य तांत्रिक बाबींच्या आधारे चोरट्याचा शोध घेण्याचे पोलिसांसमोर आव्हान आहे.
