पत्रकार परिषदेत अजय ललवाणींची माहिती
जळगाव (प्रतिनिधी) – कोणताही लेआउट तयार करताना त्या वेळच्या शासकीय नियमानुसार 15 टक्के खुली जागा सोडणे कायदेशीर बंधनकारक असताना येथील बांधकाम व्यवसायिक श्रीराम व श्रीकांत खटोड या बंधूंनी शिरसोली रोडवरील रहिवासी असलेल्यांचे वापराची हक्काची जागा लाटून अनधिकृत बांधकाम करीत कोट्यवधी रुपयांचे गैरव्यवहार धाकदपट व राजकिय वजन वापरून केला आहे, अशी माहिती पत्रकार परिषदेत सरकार व अजय ललवाणी यांनी शुक्रवार दिनांक 25 डिसेंबर रोजी दिली.
शिरसोली रस्त्यावर असलेली वादग्रस्त जागा 1973 ते 2008 दरम्यान नगरपालिकेची ओपन स्पेस म्हणून वापरात होती. शासन नियमानुसार बारा वर्षे कब्जे वहिवाटीत जागा असली तर त्या जागेचे स्वामित्व वहिवाटदारांच्या हक्कांच्या आपोआपच बहाल होते. असे असताना जागेचा उतारा मुख्याधिकारी नगरपालिका यांच्या नावावर होता. तो परस्पर बेकायदेशीरपणे बदलविण्यात आला. तो बदलताना शासनाची परवानगी, महापालिकेचा ठराव हे न करता दिनेश गजानन जोशी यांच्या नावे करण्यात आला. त्यातून खरेदी खताद्वारे श्रीराम, श्रीकांत खटोड व राम सहाय शर्मा यांच्या नावे वर्ग करण्यात आला.
शासनाच्या नगरविकास विभागाने 23 नोव्हेंबर 2020 रोजी मेहरुण शिवारातील या वादग्रस्त खुल्या जागेचे रहिवास भूखंडमध्ये रूपांतरित झाल्याबद्दल महापालिकेने दिलेली बांधकाम परवानगी, भोगवटा प्रमाणपत्र तात्काळ थांबवून जैसे थे चे आदेश दिले होते. तसेच 30 दिवसांच्या आत चौकशी अहवाल संचालकांच्या मार्फत सादर करावा असे स्पष्ट आदेश दिले होते. मात्र कोणताही चौकशी अहवाल आजपर्यंत महापालिका प्रशासनाने न देता त्या जागेवर अजूनही बांधकाम सुरूच आहे. महापालिकेचे अधिकारी, सत्ताधारी पक्षाचे तसेच खटोड बंधू यांच्याशी लागेबांधे असल्याने यांच्या मिलीभगतमुळे शासन निर्देशाला केराची टोपली दाखवण्यात आली आहे. जवळपास 30 कोटी रुपयांपेक्षा अधिकचा हा भ्रष्टाचार असल्याचे पत्रकार परिषदेत सांगण्यात आले.
