जळगाव तालुक्यातील आमोदा- घार्डी रस्त्यावरील घटना
जळगाव (प्रतिनिधी) : – तालुक्यातील आमोदा-घार्डी जवळ गतिरोधकामुळे दुचाकीला धक्का बसून, दुचाकीवरील आईच्या हातात असलेली ५ महिन्याची चिमुकलीचा रस्त्यावर पडून दुर्दैवी मृत्यू झाल्याची घटना गुरुवारी सायंकाळी ५ वाजता घडली. यामुळे तालुक्यात एकच खळबळ उडाली असून आईने रुग्णालयात मन हेलावणारा आक्रोश केला. घटनेची संबंधित पोलीस स्टेशनला नोंद घेण्याचे काम सुरू होते.
संदीप सोनवणे (वय २६, रा.देवगाव,ता.जळगाव) हे कोळन्हावी येथे माहेरी गेलेल्या त्यांच्या पत्नी ज्योती संदीप सोनवणे (वय २२) यांना घेऊन आमोदाकडून देवगावकडे जात होते. आमोदा-घार्डी या गावाजवळ प्रशासनाची कोणतीही परवानगी न घेता, उभारलेल्या गतिरोधकावर संदीप सोनवणे यांची दुचाकी आदळली. त्याचवेळी त्यांची पत्नी ज्योती सोनवणे यांच्या हातात असलेली त्यांची पाच महिन्याची चिमुकली गायत्री सोनवणे ही रस्त्यावर पडली.(केसीएन)खाली पडल्याने चिमुकलीच्या डोक्याला गंभीर मार लागला. तिला तातडीने जवळच्या शासकीय वैद्यकीय महाविद्यालयात दाखल करण्यात आले.
मात्र, डॉक्टरांनी तिला तपासून मृत घोषित केले. या घटनेमुळे जळगाव तालुक्यात शोककळा पसरली आहे. या दुर्दैवी घटनेनंतर संतप्त नागरिकांनी गतिरोधकाच्या बांधकामावर प्रश्नचिन्ह उभे केले आहे. या रस्त्यालगत अनेक गतिरोधक नियमबाह्य पद्धतीने आणि धोकादायक ठिकाणी बनवलेले आहेत. याच गतिरोधकावर दुचाकी घसरून एक दांम्पत्य देखील जखमी झाल्याची घटना शुक्रवारी घडली. दोन दिवसात या अपघातांसह याठिकाणी दररोज किरकोळ अपघात होत असल्याची माहिती नागरिकांनी दिली आहे. शुक्रवारी दुपारी १ वाजता याच गतीरोधकावर दुचाकी घसरून दांम्पत्याचा अपघात झाला आहे.
