दोन दिवसात ३३ जेसीबीने सुमारे ७७ हेक्टर वन जमीन झाली मोकळी
चोपडा (प्रतिनिधी) : येथील प्रसिद्ध सातपुडा पर्वतरांगांच्या पायथ्याशी असलेल्या उनपदेव शिवारातील राखीव वन क्षेत्र क्रमांक १९७ मधील जंगलातील वन जमिनीवरील अतिक्रमणे वन विभागामार्फत काढण्यात आली. यासाठी राज्य राखीव दलाची मदत घेत जवळपास ७७ हेक्टर वरील वनअतिक्रमणे नेस्तनाबूत करण्यात वनविभागाला यश आले आहे.
अडावद वनपरिक्षेत्रातील राखीव वनखंड क्र.१९७ हेक्टर मधील क्षेत्र ७७.०१ क्षेत्रावर काही स्थानिक लोकांनी अवैध अतिक्रमण करून शेती केली होती. या ठिकाणी वन विभागाने ३३ जेसीबीच्या सहाय्याने दोन दिवस कारवाई करत सर्व अतिक्रमण निर्मूलन केले आहे. पहिल्या दिवशी ७७.०१ क्षेत्रापैकी ३५ हेक्टर क्षेत्रात १३ जेसीबी यंत्राच्या साहय्याने अतिक्रमण निष्कासीत केले असून बुधवार दि.३ रोजी २० जेसीबी यंत्राच्या सहाय्याने खोदकाम करुन सायंकाळी ६ वाजेपर्यंत उर्वरीत ४२.०१ हेक्टर अतिक्रमण क्षेत्र निष्कासीत केले आहे.
जिल्हाधिकारी आयुष प्रसाद व पोलीस अधीक्षक यांच्याशी समन्वय साधून यावल वनविभागाचे उपवनसंरक्षक जमीर एम.शेख, सहा, वनसंरक्षक प्रथमेश वि. हाडपे, संतोष चव्हाण, सहाय्यक पोलीस निरीक्षक अडावद पोलीस स्टेशन, प्रशांत एस. साबळे, वनपरिक्षेत्र अधिकारी अडावद, बी. के. थोरात, वनपरिक्षेत्र अधिकारी चोपडा एस.एम. सोनवणे, वनपरिक्षेत्र अधिकारी वैजापुर, जी. आर. बडगुजर, वनपरिक्षेत्र अधिकारी देवझिरी व ए.सी. पाटील, वनपरिक्षेत्र अधिकारी गस्तीपथक यावल यांच्यासह चोपड़ा तहसिल कार्यालयाचे महसुल नायब तहसिलदार, चोपडा उपवनविभागातील वनपाल, वनरक्षक, अडावद पोलीस कर्मचारी, आरसीपी कर्मचारी, वनमजूर, संरक्षण मजुर असे एकुण १०० पुरुष व महिला कर्मचारी यांनी सदरची कारवाई केली.
वन जमिनीवर केलेला अवैध कब्जा खपवून घेतला जाणार नाही. इथून पुढे आढळून आल्यास कठोर कारवाई करण्यात येईल असे वनपरिक्षेत्र अधिकारी प्रशांत एस. साबळे यांनी सांगितले आहे.
