यावल तालुक्यात घडली होती घटना
यावल (प्रतिनिधी) :- यावल-भुसावळ रस्त्यावर पेट्रोल पंपाजवळ शुक्रवार दि. १८ ऑक्टोबर रोजी एका दाम्पत्याच्या दुचाकीचे टायर फुटून भीषण अपघात घडला होता. यात पतीचा जागीच मृत्यू झाला होता. पत्नी गंभीर जखमी झाली होती. गंभीर जखमी असलेल्या हेमलता जगदीश अत्तरदे यांचा सोमवारी रात्री उपचारादरम्यान मृत्यू झाला. घटनेची संबंधित पोलीस स्टेशनला नोंद करण्यात आली आहे.
यावल-भुसावळ रस्त्यावर शहराच्या बाहेर पेट्रोल पंपाच्या समोर शुक्रवारी सायंकाळी ४ वाजता भुसावळकडून यावलकडे दुचाकी क्रमांक (एम. एच.१९, एन. २४३३) द्वारे जगदीश वासुदेव अत्तरदे (वय ५३) व त्यांची पत्नी हेमलता जगदीश अत्तरदे (वय ४५) हे पती-पत्नी येत होते. दरम्यान, पेट्रोल पंपाच्या जवळ त्यांच्या दुचाकीचे पुढील टायर फुटले आणि भरधाव वेगातील दुचाकी थेट रस्त्याच्या कडेला असलेल्या झाडावर जाऊन धडकली.
या अपघातात जगदीश अत्तरदे जागीच ठार झाले होते. तर त्यांची पत्नी हेमलता या गंभीर जखमी होत्या. गंभीर जखमी महिलेवर जळगाव येथे खासगी रुग्णालयात उपचार सुरू होते. उपचारादरम्यान सोमवारी रात्री महिलेचा मृत्यू झाला. घटनेची संबंधित पोलीस स्टेशनला नोंद करण्यात आली आहे.
