एरंडोल तालुक्यात धरणगाव रस्त्यावरील घटना
एरंडोल ( प्रतिनिधी ) – शेतात पिकाला पाणी भरून दुचाकीने एरंडोलकडे घरी परत येत असताना समोरून येणाऱ्या दुचाकीने जबर धडक दिल्याने शेतकरी गंभीर जखमी झाले होते. त्यांना रुग्णवाहिकेने उपचारार्थ जळगाव येथे नेत असताना पिंपळकोठे गावानजीक त्यांचा मृत्यू झाल्याची घटना २३ डिसेंबर रोजी पहाटे साडेचार ते पाच वाजेच्या सुमारास धरणगाव रस्त्यावर बजरंग ट्रेडर्स या दुकानाजवळ घडली. या प्रकरणी एरंडोल पोलीस स्टेशनला गुन्हा दाखल करण्यात आला आहे.
एरंडोल येथील शेतकरी लहूदास पोपट महाजन (वय ५५) हे ओम नगरमध्ये राहत होते. महाजन हे त्यांच्या बजाज कंपनीच्या लाल रंगाच्या सिटी १०० या दुचाकी (एमएच- १९ डीइ ९७२१) ने शेतात पिकांना पाणी भरण्यासाठी गेले होते. पाणी भरण्याचे काम आटोपून ते त्यांच्या दुचाकीने एरंडोलकडे घरी परत येत होते. धरणगाव ते एरंडोल रस्त्यावर बजरंग ट्रेडर्स या दुकानाजवळ समोरून येणाऱ्या दुचाकी (एमएच – १९, डीएक्स ६३५७) व त्यांच्या दुचाकीची समोरासमोर धडक झाली. या अपघातात लहूदास महाजन हे गंभीर जखमी झाले. त्यांना जळगाव येथे उपचारार्थ नेत असताना त्यांचा पिंपळकोठे गावाजवळ मृत्यू झाला. याप्रकरणी एरंडोल पोलीस ठाण्यात गुन्हा दाखल करण्यात आला आहे. या घटनेचा तपास सहाय्यक पोलीस निरीक्षक शंकर पवार, कपिल पाटील, संतोष चौधरी, नितीन पाटील, योगेश महाजन करत आहेत.
