अज्ञात चोरट्याविरुद्ध धरणगाव पोलिस ठाण्यात गुन्हा दाखल
धरणगाव ( प्रतिनिधी ) – शहरातील आठवडे बाजारात बाजार करण्यासाठी गेलेल्या ६८ वर्षीय शेतकऱ्याला अज्ञात इसमाने नातेवाईक असल्याचे सांगून त्याच्याकडील रोख रक्कम जबरदस्तीने हिसकावून नेल्याची घटना घडली. याप्रकरणी धरणगाव पोलिस ठाण्यात अज्ञात चोरट्याविरुद्ध भारतीय न्याय संहिता कलम ३०४(२) अन्वये गुन्हा दाखल करण्यात आला आहे.
याबाबत कांतीलाल भीका बाविस्कर (वय ६८, व्यवसाय शेती, रा. धानोरा, ता. धरणगाव, जि. जळगाव) यांनी पोलिसांत फिर्याद दिली आहे. फिर्यादीनुसार, दि. १७ सप्टेंबर २०२६ रोजी सकाळी साडेअकराच्या सुमारास ते धरणगाव येथील आठवडे बाजारात बाजार करण्यासाठी गेले होते. यावेळी एका अज्ञात इसमाने फिर्यादी यांचा नातेवाईक असल्याचे सांगून त्यांच्याकडील सुमारे ८ हजार ५०० रुपये रोख रक्कम बळजबरीने हिसकावून घेतली आणि तेथून पळून गेला.
हिसकावून नेलेल्या रकमेपैकी ५०० रुपयांच्या दराच्या १७ चलनी नोटा असल्याचे फिर्यादीत नमूद करण्यात आले आहे. घटनेनंतर फिर्यादी यांनी धरणगाव पोलिस ठाण्यात तक्रार दाखल केली. त्यानुसार दि. २९ सप्टेंबर २०२६ रोजी सायंकाळी ५.१७ वाजता गुन्हा दाखल करण्यात आला आहे.
या प्रकरणाचा पुढील तपास पोना/३१३४ धननेश्वर कोळी हे करीत आहेत. अज्ञात आरोपीचा शोध घेण्यासाठी पोलिसांकडून तपास सुरू असून, अद्याप कोणालाही अटक करण्यात आलेली नाही.
