डांभूर्णी येथे अज्ञात ट्रकच्या धडकेत तरुणाचा मृत्यू

यावल (प्रतिनिधी) : डांभूर्णी (ता. यावल) गावाजवळ अज्ञात ट्रकच्या धडकेत २६ वर्षीय तरुणाचा मृत्यू झाल्याची दुर्दैवी घटना १८ जून रोजी मध्यरात्री घडली. या प्रकरणी यावल पोलिस ठाण्यात अज्ञात ट्रक चालकाविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, पवन रविंद्र सोळुंके (वय २६, रा. कोळन्हावी, ता. यावल) हे डांभूर्णी गावाजवळील रस्त्यावरून पायी जात असताना भरधाव वेगाने आलेल्या अज्ञात ट्रकने त्यांना मागून जोरदार धडक दिली. या अपघातात त्यांच्या डोक्याला गंभीर दुखापत झाली. उपचारापूर्वीच त्यांचा मृत्यू झाला.
अपघातानंतर ट्रक चालकाने जखमीला मदत न करता घटनास्थळावरून पलायन केल्याचे फिर्यादीत नमूद करण्यात आले आहे. याप्रकरणी भारतीय न्याय संहितेच्या विविध कलमान्वये अज्ञात ट्रक चालकाविरुद्ध गुन्हा दाखल करण्यात आला असून पुढील तपास पोलीस उपनिरीक्षक वसंतराव बेलदार करीत आहेत.