पारोळा (प्रतिनिधी) : धुळेकडून पारोळ्याकडे जाणाऱ्या रस्त्यावर झालेल्या भीषण अपघातात दुचाकीस्वाराचा मृत्यू झाल्याची घटना १६ जून रोजी सायंकाळी साडेसात वाजेच्या सुमारास घडली. या प्रकरणी ट्रक चालकाविरुद्ध पारोळा पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, अनिल मधुकर भिल (वय ४२, रा. वंजारी खुर्द, ता. पारोळा) हे त्यांच्या ताब्यातील बजाज प्लॅटिना (एमएच-१८ बीजे-५८८८) या दुचाकीने धुळेकडून पारोळ्याकडे जात होते. दरम्यान, रस्त्याच्या कडेला असलेल्या पांढऱ्या पट्ट्याबाहेरून दुचाकी चालवत असताना समोरून भरधाव वेगाने येणाऱ्या अशोक लेलँड ट्रक (जीजे-३६ व्ही-७०३२) ने दुचाकीला जोरदार धडक दिली.
या अपघातात अनिल भिल यांच्या डोक्याला, हातापायांना व शरीराच्या इतर भागांना गंभीर दुखापत होऊन त्यांचा मृत्यू झाला. अपघातानंतर ट्रक चालक मुस्ताक खान हाजी खान (रा. गोडा, ता. सेडवा, जि. बाडमेर, राजस्थान) याच्याविरुद्ध निष्काळजीपणे वाहन चालवून मृत्यूस कारणीभूत ठरल्याप्रकरणी गुन्हा दाखल करण्यात आला आहे.
