जळगावात मध्यरात्री बेकायदेशीर वाळू वाहतूक पकडली; २ लाखांच्या ट्रॅक्टरसह वाळू जप्त, जिल्हापेठ पोलिसांची कारवाई
एरंडोलच्या चालकाविरुद्ध गुन्हा दाखल; शिवकॉलनी चौकातील घटना
जळगाव:
शहरातील शिवकॉलनी चौकात मध्यरात्री गस्त घालणाऱ्या जिल्हापेठ पोलिसांच्या पथकाने बेकायदेशीरपणे वाळूची (गौण खनिज) वाहतूक करणाऱ्या ट्रॅक्टरवर छापा टाकून कारवाई केली. या कारवाईत ५ हजार रुपयांची वाळू आणि २ लाख रुपये किमतीचे ट्रॅक्टर-ट्रॉली असा एकूण २ लाख ५ हजार रुपयांचा मुद्देमाल जप्त करण्यात आला आहे. या प्रकरणी चालकाविरुद्ध गुन्हा दाखल करण्यात आला आहे.
मिळालेल्या माहितीनुसार, जिल्हापेठ पोलीस ठाण्याचे कर्मचारी ६ ऑगस्ट रोजी मध्यरात्री गस्त घालत असताना, रात्री ३:१५ वाजेच्या सुमारास शिवकॉलनी चौकात संशयित स्वराज ७४४ कंपनीचे ट्रॅक्टर (क्र. MH 19 BJ 5337) व ट्रॉली (क्र. MH 19 AN 8060) येताना दिसले. पोलिसांनी ट्रॅक्टर थांबवून विचारपूस व तपासणी केली असता, त्यात विनापरवाना बेकायदेशीरपणे वाळू भरलेली असल्याचे निदर्शनास आले.
पोलीस कर्मचारी चंद्रकांत पाटील यांनी दिलेल्या तक्रारीवरून ट्रॅक्टर चालक रविंद्र भानुदास लांबोळे (वय ३१, रा. रिंगणगाव, ता. एरंडोल, जि. जळगाव) याच्याविरुद्ध भारतीय न्याय संहिता (BNS) कलम ३०३(२) आणि महाराष्ट्र जमीन महसूल संहिता १९६६ च्या कलम ४८(७), ४८(८) अन्वये गुन्हा नोंदवण्यात आला आहे.
ही कारवाई सपोनि अनिल वाघ आणि पोउपनि गोपाळ देशमुख यांच्या मार्गदर्शनाखाली करण्यात आली. प्रकरणाचा पुढील तपास पोलीस हवालदार रुस्तम तडवी करत आहेत.
