गुन्हेगारीचे उदात्तीकरण, स्टंटबाजी आणि महिलांचा अवमान करणाऱ्या व्हिडिओंवर पोलिसांची कारवाई
जळगाव (प्रतिनिधी) – सोशल मीडियावर गुन्हेगारीचे उदात्तीकरण करणारे, वाहतूक नियमांचे उल्लंघन करत स्टंटबाजीचे व्हिडिओ पोस्ट करणारे तसेच महिलांचा अवमान करणारे रील्स तयार करून प्रसारित करणाऱ्यांविरोधात जळगाव पोलिसांनी विशेष सायबर पॅट्रोलिंग मोहीम हाती घेतली आहे. या मोहिमेअंतर्गत संशयास्पद आणि आक्षेपार्ह रील्सची तपासणी करून संबंधित व्यक्तींना ओळख पटवत पोलिस मुख्यालयात बोलावण्यात येत आहे.
पोलिसांनी दिलेल्या माहितीनुसार, सोशल मीडियावर प्रसिद्धीच्या हव्यासापोटी काही तरुणांकडून गुन्हेगारांना नायकासारखे दाखवणारे, कायद्याचे उल्लंघन करणारे आणि समाजात चुकीचा संदेश देणारे व्हिडिओ मोठ्या प्रमाणावर प्रसारित केले जात आहेत. अशा आशयाचा युवकांवर विपरीत परिणाम होत असून, गुन्हेगारीकडे आकर्षण निर्माण होण्याची शक्यता वाढत आहे. तसेच ज्येष्ठ नागरिकांमध्येही चिंता आणि असुरक्षिततेची भावना निर्माण होत असल्याचे पोलिसांनी नमूद केले.
सायबर पॅट्रोलिंगद्वारे अशा रील्सची बारकाईने तपासणी करण्यात येत असून संबंधित व्यक्तींना समुपदेशनासाठी पोलिस मुख्यालयात बोलावले जात आहे. या कारवाईचा उद्देश केवळ दंडात्मक नसून, समाजात कायद्याबद्दल आदर निर्माण करणे, तरुणांना चुकीच्या प्रवृत्तींपासून परावृत्त करणे आणि सोशल मीडियाचा जबाबदारीने वापर करण्याबाबत जनजागृती करणे हा आहे.
जळगाव पोलिसांनी नागरिकांना सोशल मीडियाचा वापर करताना कायद्याचे पालन करण्याचे, समाजात तेढ निर्माण करणारी किंवा गुन्हेगारीला प्रोत्साहन देणारी सामग्री प्रसारित न करण्याचे आवाहन केले आहे. अभिव्यक्ती स्वातंत्र्याचा गैरवापर करून समाजविघातक संदेश पसरवणाऱ्यांवर आवश्यक ती कायदेशीर कारवाई करण्यात येईल, असा इशाराही पोलिस प्रशासनाने दिला आहे.
