बद्रीनाथ दर्शनापूर्वी प्रकृती बिघडल्याने हृदयविकाराचा त्रास
चोपडा (प्रतिनिधी):- येथील ५९ वर्षीय प्रतिभा नारायण बोरोले यांचे उत्तराखंड राज्यात चारधाम यात्रेदरम्यान निधन झाल्याची दुर्दैवी घटना समोर आली आहे. यात्रेचा शेवटचा टप्पा म्हणून बद्रीनाथ येथे दर्शनासाठी गेल्या असताना त्यांची अचानक प्रकृती खालावली. दरम्यान, केंद्रीय क्रीडा व युवक कल्याण राज्यमंत्री रक्षा खडसे यांनी या प्रकरणात विशेष लक्ष घालून संबंधित यंत्रणांशी संपर्क साधल्याने त्यांचे पार्थिव मुंबईपर्यंत आणण्याची व्यवस्था करण्यात आली आहे.
चोपड्यातील पंकज नगर परिसरात वास्तव्यास असलेल्या प्रतिभा बोरोले या १६ भाविकांच्या गटासोबत चारधाम यात्रेसाठी रवाना झाल्या होत्या. यात्रेच्या सुरुवातीपासूनच त्यांच्या गटाने क्रमाक्रमाने यमुनोत्री, गंगोत्री आणि केदारनाथ या पवित्र स्थळांचे दर्शन घेतले. यात्रेचा शेवटचा टप्पा म्हणून बद्रीनाथ मंदिर येथे दर्शन घेण्याचे नियोजन होते. मात्र, बद्रीनाथ दर्शनाच्या आदल्या दिवशी रात्री अचानक त्यांच्या प्रकृतीत बिघाड झाला. श्वास घेण्यास त्रास जाणवू लागल्याने आणि अस्वस्थता वाढल्याने त्यांना तातडीने उपचारासाठी चमोली जिल्ह्यातील रुग्णालयात दाखल करण्यात आले. डॉक्टरांनी ऑक्सिजन सपोर्टसह तातडीने उपचार सुरू केले, मात्र प्रकृतीत सुधारणा न झाल्याने १ मे रोजी सकाळी आठ वाजण्याच्या सुमारास त्यांची प्राणज्योत मालवली.
या घटनेची माहिती चोपड्यात पोहोचताच संपूर्ण शहरात शोककळा पसरली. प्रतिभा बोरोले यांच्या निधनानंतर स्थानिक प्रशासनाने तत्काळ हालचाली सुरू केल्या. केंद्रीय राज्यमंत्री रक्षा खडसे यांनी या प्रकरणात विशेष लक्ष घालून आवश्यक कागदपत्रे आणि वैद्यकीय औपचारिकता जलदगतीने पूर्ण करून पार्थिव मुंबईपर्यंत आणण्याची व्यवस्था केली.
प्रतिभा बोरोले या चोपड्याचे माजी नगरसेवक नारायण बोरोले यांच्या पत्नी, पंकज समूहाचे संस्थापक अध्यक्ष डॉ. सुरेश बोरोले यांच्या वहिनी आणि उपनगराध्यक्ष पंकज बोरोले यांच्या काकू होत. कुटुंबातील ज्येष्ठ सदस्या म्हणून सर्वांना एकत्र ठेवणाऱ्या, तसेच धार्मिक व सामाजिक कार्यात नेहमी सक्रिय असणाऱ्या व्यक्ती म्हणून त्यांची ओळख होती. त्यांच्या निधनामुळे राजकीय, सामाजिक आणि धार्मिक क्षेत्रातील मान्यवरांनी तीव्र दुःख व्यक्त केले आहे.
