सव्वा दोन लाखांचा ऐवज लांबविला ; चाळीसगाव तालुक्यातील घटना
जळगाव (प्रतिनिधी) : चाळीसगाव तालुक्यातील करगाव शिवारात एका लॉन्समध्ये आयोजित साखरपुड्याच्या कार्यक्रमात नवरदेवाच्या आईची पर्स लांबवण्यात आला आहे. एकूण २ लाख १६ हजार रूपयांचा ऐवज लंपास झाल्याची घटना उघडकीस आली आहे. याप्रकरणी अज्ञात चोरट्याच्या विरोधात चाळीसगाव ग्रामीण पोलिसांनी गुन्हा दाखल केला आहे.
चाळीसगाव शहरालगतच्या करगाव शिवारात असलेल्या एका रिसार्टमध्ये सागर दिलीप पाटील यांच्याकडे साखरपुड्याचा कार्यक्रम दि. ७ जुलै रोजी दुपारी २ वाजेच्या सुमारास आयोजित केला होता. त्याच ठिकाणी नियोजित वर आणि वधू यांचे फोटो शूट सुरू असताना मुलाच्या आईची पर्स लांबवण्यात आल्याचा प्रकार घडला. फोटो काढण्यासाठी मुलाच्या आईने जवळची पर्स सोप्यावर ठेवली. मात्र, फोटो काढून आल्यावर पर्स सोफ्यावर नसल्याचे त्यांच्या लक्षात आले. अज्ञात चोरट्याने वऱ्हाडींची पर्स लांबवल्याचे लक्षात येताच सागर दिलीप पाटील यांनी दि. ९ जुलै रोजी चाळीसगाव ग्रामीण पोलिस ठाणे गाठून तक्रार दिली. त्यानुसार अज्ञात चोरट्याच्या विरोधात पोलिसांनी गुन्हा दाखल केला आहे.
