सर्व विद्यार्थी वैद्यकीय अभ्यासक्रमाचे असल्याची माहिती
रशियातून जळगावात आणण्याचे शासनाचे प्रयत्न सुरू
जळगाव (प्रतिनिधी) : रशियातील सेंट पीटर्सबर्ग नजीक वोलकोव्ह नदीत वैद्यकीय शिक्षण घेत असलेल्या जळगाव जिल्ह्यातील चार विद्यार्थ्यांचा बुडून मृत्यू झाल्याची घटना दि. ४ जून रोजी घडल्याची माहिती समोर येत आहे. घटनेमध्ये एका विद्यार्थिनीला वाचविण्यात यश मिळाले आहे. चारही जणांचे मृतदेह जळगाव जिल्ह्यात आणण्यासाठी जिल्हा प्रशासनाचे प्रयत्न सुरू आहेत.
मयत विद्यार्थ्यांपैकी दोन विद्यार्थी हे जळगाव जिल्ह्यातील अमळनेर येथील रहिवासी तर तिसरा विद्यार्थी भडगाव तर चौथा यावल येथील असल्याची माहिती समोर आली आहे. तर एक विद्यार्थिनी बचावली आहे. सर्व पाचही विद्यार्थी रशियातील सेंट पीटर्सबर्ग मधील नॉबबोर्ड या विद्यापीठात वैद्यकीय शिक्षण घेत होते. मंगळवारी दि. ४ जून रोजी संध्याकाळी सेंट पीटर्सबर्गजवळ असलेल्या वोलकोव्ह या नदीत पोहण्यासाठी गेले असताना चौघांचा बुडून मृत्यू झाला.
मयत विद्यार्थ्यांमध्ये जिया फिरोज पिंजारी (वय २०) या विद्यार्थिनीसह जीशान अशपाक पिंजारी (वय २०, दोन्ही रा. अमळनेर), गुलमोगोस मोहम्मद याकूब मलिक (वय २१, रा.यावल) व हर्षल अनंतराव देसले (वय १९ रा. भडगाव) यांचा समावेश आहे तर निशा भूपेश सोनवणे (वय १९) हिला वाचवण्यात यश आलं आहे. तिच्यावर नोव्हागोरोड क्लिनिकल हॉस्पिटल येथे उपचार सुरू आहेत.
हर्षल देसले या विद्यार्थ्यांचा मृतदेह सापडला आहे. इतर तीनही विद्यार्थ्यांचा शोध सुरू असल्याची जिल्हाधिकारी यांनी माहिती दिली आहे. या घटनेची माहिती रशिया येथील प्रशासनाने व पोलिसांनी भारतीय दूतावासाला दिली. त्यानंतर भारतीय दूतावास यांनी जळगावचे जिल्हाधिकारी यांच्याशी संपर्क साधत याबाबत माहिती दिली.
मृत विद्यार्थ्यांच्या पालकांशी संपर्क साधत त्यांनाही याची माहिती दिली. चार विद्यार्थ्यांच्या मृत्यूने जळगाव जिल्ह्यावर शोककळा पसरली आहे. हर्षल देसले या विद्यार्थ्यांचा मृतदेह भारतात पाठवण्यासाठी रशियाची कायदेशीर प्रक्रिया सुरू आहे.
