जळगाव शहरातील योजना नगर येथील घटना
जळगाव (प्रतिनिधी) :- शहरातील कोल्हे हिल्स परिसरातील योजना नगर येथे तब्बल १३ महिलांकडून एकूण ५५ लाख रुपये घेऊन त्यांना एकही रुपया परत न करणाऱ्या पती-पत्नी विरोधात रामानंदनगर पोलीस स्टेशनला गुन्हा दाखल करण्यात आला आहे. भिशी व आजारपणाचे विविध कारणे देत सदर महिलांच्या बचत गटाला देखील या पती-पत्नीने कर्ज काढून पैसे मागितल्याचा प्रकार उघड झाला आहे. याप्रकरणी संशयित महिलेला पोलिसांनी ताब्यात घेत अटक केली आहे.
गिरणा पंपिंग रस्त्यावर कोल्हे हिल्स परिसरात योजनानगरमध्ये राहणाऱ्या महिलांकडून दर महिन्याला खासगी भिशीच्या नावाने संशयित आरोपी सविता संजय सोळंखे व तिचा पती संजय धोंडू सोळंखे (दोन्ही रा. योजना नगर) यांनी भिशीच्या नावाने पैसे जमा केले. त्यात काही जणांच्या भिशी लागल्या. मात्र, पैशाचे काम असल्याचे सांगत ही रक्कम सदर महिलेनेच ठेवून घेतली. त्याबदल्यात जास्त पैसे मिळतील, असे आमिषही या महिलेसह तिचा पती संजय सोळंखे या दोघांनी संगनमत करून दाखवले.
त्यानंतरदेखील सासरे आजारी असल्याने त्यांच्या उपचारासाठी पैशाची आवश्यकता असल्याचे सांगून परिसरातील महिलांकडून संशयित महिला सविता सोळंके हिने उसनवारीने पैसे घेतले. या महिलांचा बचत गटही असल्याने त्यांच्या नावाने बचत गटाच्या माध्यमातून कर्ज तर घेतलेच, शिवाय काही महिलांच्या नावावर वैयक्तिक कर्जही काढून ती रक्कमही सोळंखे या महिलेने घेतली. प्रत्येक वेळी आजार अथवा कोणत्याही कामाच्या बहाण्याने विश्वास संपादन करत संशयित महिला रक्कम घेत गेली.
घटनेतील फिर्यादी पल्लवी विजय ठोसर (३९, रा. योजनानगर) या महिलेकडून सविता सोळंखे या महिलेने १३ लाख ४६ हजार २०० रुपये घेतले. याशिवाय इंदूबाई डोंगर डोळे, मीनाबाई संदीप पाटील, सोनाली संतोष जलंकार, गायत्री प्रदीप बाणाईत, ज्योती विलास सुरवाडे, सिंधूबाई जगन्नाथ पारधे, लक्ष्मी श्यामकांत तायडे, अनिता हेमराज सोनवणे, आशा सुनील लोखंडे, आशा अशोक सोनवणे, अश्विनी तुषार गायकवाड, कोकिळाबाई प्रकाश पाटील (सर्व रा. योजनानगर) यांच्याकडून ४१ लाख ७६ हजार ८० रुपये एवढी रक्कम घेतली.
दिलेले पैसे परत मिळावेत म्हणून या महिलांनी वारंवार सदर महिलेच्या घरी चकरा मारल्या. मात्र, उडवाउडवीची उत्तरे मिळाली. पैशाचा तगादा वाढत असल्याने सदर महिला पतीसह गायब झाली. दरम्यान गुरुवारी दि.२२ फेब्रुवारी रोजी सदर संशयित महिला सविता संजय सोळंके हीस पोलिसांनी अटक केली असून तिचा पती अद्याप फरार आहे. याप्रकरणी पल्लवी ठोसर यांनी तालुका पोलिस ठाण्यात फिर्याद दिली. त्यावरून सविता संजय सोळंखे व तिचा पती संजय धोंडू सोळंखे या दाम्पत्याविरुद्ध गुन्हा दाखल करण्यात आला आहे. पुढील तपास सहायक पोलिस निरीक्षक अनंत अहिरे करीत आहेत.
