जळगाव (प्रतिनिधी):- धुळे महामार्गावरील हॉटेल गावकरीजवळ रस्ता ओलांडत असताना भरधाव कारने दुचाकीला जोरदार धडक दिल्याने महिला आणि तिची दोन लहान मुले गंभीर जखमी झाल्याची घटना सोमवारी (दि. २९ जून) सायंकाळी घडली. याप्रकरणी तालुका पोलीस ठाण्यात कारचालकाविरुद्ध गुन्हा दाखल करण्यात आला आहे.
जखमींमध्ये विद्या योगेश राजपूत (वय २९, रा. महादेव नगर, जळगाव) तसेच त्यांचा मुलगा वंश आणि मुलगी यशस्वी यांचा समावेश आहे.
पोलिसांनी दिलेल्या माहितीनुसार, विद्या राजपूत या आपल्या दोन्ही मुलांना दुचाकीवरून ट्युशनसाठी सोडण्याकरिता धुळे महामार्ग ओलांडत होत्या. त्यावेळी जळगावकडून धुळ्याकडे भरधाव वेगाने येणाऱ्या (एमएच-१९ एपी-२१७४) क्रमांकाच्या कारने त्यांच्या दुचाकीला जोरदार धडक दिली.
या अपघातात महिला आणि तिची दोन्ही मुले गंभीर जखमी झाली. अपघातानंतर स्थानिक नागरिकांनी तातडीने मदत करत तिघांना उपचारासाठी रुग्णालयात दाखल केले.
याप्रकरणी विद्या राजपूत यांनी दिलेल्या फिर्यादीवरून कारचालक अभिजीत सोनवणे (रा. मुक्ताईनगर, ता. जळगाव) याच्याविरुद्ध तालुका पोलीस ठाण्यात गुन्हा दाखल करण्यात आला आहे. या घटनेचा पुढील तपास पोहेकॉ प्रवीण पाटील करीत आहेत.
