अतिवृष्टीचा फटका; घराची मातीची भिंत कोसळून वृद्धाचा दुर्दैवी मृत्यू
पारोळा तालुक्यातील वसंतनगर येथील घटना; अकस्मात मृत्यूची नोंद
पारोळा | प्रतिनिधी
पारोळा तालुक्यातील वसंतनगर येथे सतत सुरू असलेल्या अतिवृष्टीमुळे घराची मातीची भिंत कोसळून एका ७० वर्षीय वृद्धाचा दुर्दैवी मृत्यू झाला. या घटनेमुळे परिसरात हळहळ व्यक्त होत आहे.
पोलिसांनी दिलेल्या माहितीनुसार, बाबू कल्लू जाधव (वय ७०, रा. वसंतनगर, ता. पारोळा) यांच्या घराची मातीची भिंत अचानक कोसळली. भिंतीच्या ढिगाऱ्याखाली दबून त्यांचा जागीच मृत्यू झाला.
घटनेची माहिती मिळताच पोलिसांनी घटनास्थळी धाव घेत पंचनामा केला. याप्रकरणी पारोळा पोलीस ठाण्यात अकस्मात मृत्यू रजिस्टर क्रमांक ७८/२०२६ अन्वये भारतीय नागरिक सुरक्षा संहिता (BNSS) कलम १९४ अंतर्गत नोंद करण्यात आली आहे.
या घटनेचा पुढील तपास पोलीस हवालदार संदीप सातपुते करीत आहेत.
दरम्यान, जिल्ह्यात सुरू असलेल्या मुसळधार पावसामुळे कच्ची व मातीची घरे धोकादायक बनली असून, नागरिकांनी विशेष खबरदारी घेण्याचे आवाहन प्रशासनाकडून करण्यात आले आहे.
