रेल्वे अपघातात अज्ञात व्यक्तीचा मृत्यू; मृताची ओळख पटविण्याचे आवाहन
जळगाव तालुका पोलिसांत अकस्मात मृत्यूची नोंद; तपास सुरू
जळगाव | प्रतिनिधी
जळगाव तालुका पोलीस ठाण्याच्या हद्दीत रेल्वे अपघातात एका अज्ञात पुरुषाचा मृत्यू झाल्याची घटना उघडकीस आली आहे. याप्रकरणी जळगाव तालुका पोलीस ठाण्यात अकस्मात मृत्यू क्रमांक 54/2026 अन्वये भारतीय नागरिक सुरक्षा संहिता कलम 194 प्रमाणे नोंद करण्यात आली आहे.
पोलिसांनी दिलेल्या माहितीनुसार, रेल्वे प्रशासनाकडून मिळालेल्या माहितीनुसार शिरसोली ते जळगाव डाउन रेल्वेमार्गावर खांब क्रमांक 410/15 ते 410/17 दरम्यान एका अज्ञात पुरुषाचा मृतदेह आढळून आला. संबंधित माहिती शिरसोली उपस्थानकाकडून जळगाव रेल्वे अधिकाऱ्यांना देण्यात आली होती.
घटनेची माहिती मिळाल्यानंतर मृतदेह रेल्वे रुळावरून बाहेर काढून पुढील कार्यवाहीसाठी जिल्हा शासकीय वैद्यकीय महाविद्यालय व रुग्णालय, जळगाव येथे हलविण्यात आला.
प्राथमिक तपासात मृत्यूचे कारण रेल्वे अपघात असल्याचे समोर आले असून, मृत व्यक्तीची ओळख अद्याप पटलेली नाही. त्यामुळे मृताची ओळख पटविण्याचे काम पोलीस करीत आहेत.
या प्रकरणाचा पुढील तपास ग्रेड पोलीस उपनिरीक्षक शामकुमार मोरे करीत आहेत. तसेच संबंधित व्यक्तीबाबत कोणाला माहिती असल्यास जळगाव तालुका पोलीस ठाण्याशी संपर्क साधण्याचे आवाहन पोलिसांनी केले आहे.
