अपघातग्रस्तांना मदत करताना भरधाव इकोची धडक; मदत करणारेच जखमी
फत्तेपूर परिसरातील घटना; चालकाविरुद्ध गुन्हा दाखल
फत्तेपूर | प्रतिनिधी
रस्ते अपघातातील जखमींना मदत करण्यासाठी थांबलेल्या नागरिकांना भरधाव इको वाहनाने धडक दिल्याची घटना फत्तेपूर परिसरात घडली. या अपघातात मदत करणारे नागरिक जखमी झाले असून वाहनचालकाविरुद्ध फत्तेपूर पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार, सीसीटीएनएस क्र. ०१७०/२०२६ अन्वये भारतीय न्याय संहिता (BNS) कलम २८१, १२५, १२५(अ), १२५(ब), ३२४(४) तसेच मोटार वाहन कायदा कलम १३४(अ) व १८४ अंतर्गत गुन्हा नोंदविण्यात आला आहे.
या प्रकरणी राजेंद्र रमेश माळी (वय ४५, रा. कसबा पिंप्री, ता. जामनेर) यांनी फिर्याद दिली आहे. अपघात करणाऱ्या एमएच-०९-डीए-५४६७ क्रमांकाच्या इको वाहनाच्या चालकाविरुद्ध गुन्हा दाखल करण्यात आला असून त्याचे नाव अद्याप समोर आलेले नाही.
फिर्यादीनुसार, ३० जुलै २०२६ रोजी सायंकाळी ७ वाजेच्या सुमारास स्वराज ढाब्यासमोर पिंपळगाव–फत्तेपूर रस्त्यावर यापूर्वी झालेल्या एका अपघातातील एमएच-१९-सीयू-८८८३ क्रमांकाची कार व एमएच-२०-एफसी-६२३४ क्रमांकाची दुचाकी यांतील जखमींना मदत सुरू होती. त्याचवेळी भरधाव वेगाने आलेल्या इको वाहनाच्या चालकाने निष्काळजीपणे वाहन चालवत मदत करणाऱ्या नागरिकांनाच जोरदार धडक दिली.
या अपघातात फिर्यादी यांच्या मान, नाक, डोके व दोन्ही पायांना दुखापत झाली. तसेच इतर मदत करणारे नागरिकही जखमी झाले. अपघातानंतर चालकाने जखमींना कोणतीही वैद्यकीय मदत न करता घटनास्थळावरून निघून जाण्याचा प्रयत्न केल्याचे फिर्यादीत नमूद करण्यात आले आहे.
या प्रकरणाचा पुढील तपास पोलीस हवालदार विनोद पाटील करीत आहेत.
