जळगाव जिल्ह्यातील सातपुडा पर्वतरांगेतील घटना
आदिवासी भागातील नागरिकांचे आरोग्य धोक्यातच
रावेर (प्रतिनिधी) – जळगाव जिल्ह्यात दुर्गम भागात आजही आरोग्याचे तीनतेरा वाजलेले आहेत. सुविधा दूरदूरपर्यंत दिसत नाही, याचा प्रत्यय पुन्हा एकदा शनिवारी दिसून आला. पाल बसस्थानकासमोर महिलेला प्रसूतीच्या कळा आल्या. त्याचवेळी तेथे काही तरुण धावून आले. त्यांनी महिलेला तत्काळ ग्रामीण रुग्णालयात नेण्याचा प्रयत्न केला. मात्र रस्त्यातच महिलेची प्रसूती झाली. तरीही रुग्णालयात नेऊन महिलेचा व बाळाचा जीव वाचविण्यात तरुणांना यश आले आहे.
घटनेतील बाळ आणि बाळंतीण सुखरूप आहे. सातपुड्यातील दुर्गम आदिवासी भागातील आरोग्याच्या समस्या किती बिकट आहेत हे पुन्हा एकदा दिसून आले आहे. आदिवासी भागात दूर दूर पर्यंत आरोग्य सुविधांचा लवलेशही दिसून येत नाही. सातपुड्यातील पिंपरकुंड या दुर्गम भागातील गीता मुन्ना बारेला (वय ३०) हि आदिवासी महिला व त्यांचे कुटुंब मजुरी कामासाठी वास्तव्यास निंभोरा येथे आहे. पिंपरकुंड येथून निंभोरा येथे जात असताना पाल बसस्थानकासमोर या महिलेला प्रसूतीच्या वेदना जाणवू लागल्या. या महिलेसोबत तिची सासू होती.सोबत माणूस नसल्यामुळे आता करावे, असा प्रश्न महिलेच्या सासूबाईला पडला. तितक्यात त्यांनी बसस्थानक आवारात समोरच उभ्या असलेल्या नासीर तडवी या युवकाला हाक दिली. या वेळी नासीर व त्यांचे मित्र भिकारी तडवी, रौनक तडवी यांनी तत्काळ या आदिवासी महिलेला ग्रामीण रुग्णालयात खासगी वाहनात बसविले.
मात्र रस्त्यातच महिलेची प्रसूती झाली व या महिलेने लहान गोंडस मुलीला जन्म दिला. युवकांनी लागलीच महिलेला ग्रामीण रुग्णालयात नेले. तेथे आधिपरिचारक विश्वास सुधाकर राव यांनी महिलेची व बाळाची तपासणी केली. प्रसूतीमुळे महिलेला रक्तस्त्राव सुरू होता. त्यासाठी सर्वतोपरी प्रयत्न करून बाळाला व आईला योग्य औषधोपचार करून योग्य ते उपचार दिले व महिलेचे प्राण वाचवले. येथील ग्रामीण रुग्णालयात गेल्या एक महिन्यापासून वैद्यकीय अधिकारी नसल्याने रुग्णांचे हाल होत आहे. दरम्यान, सातपुड्याच्या आदिवासी भागातील आरोग्य यंत्रणा खिळखिळी झाली असून, आरोग्य विभागातील अनेक पदे रिक्त असल्याने तेथील रुग्णांना वेळेवर चांगल्या दर्जाची आरोग्य सेवा मिळत नसल्याची ओरड कायमच होत असते. परंतु आरोग्य विभागाकडून या समस्यांकडे डोळेझाक केली जात असल्याचे वास्तव आहे.
