बोदवड तालुक्यातील नाडगावजवळची घटना
बोदवड (प्रतिनिधी) :- बोदवड ते मुक्ताईनगर रस्त्यावर नाडगावजवळील उड्डाणपुलाजवळ भरधाव कंटेनरने दोन दुचाकींना धडक दिली. या अपघातात ५ मजूर जखमी झाले आहेत. ही घटना मंगळवारी १७ रोजी सायंकाळी ७ वाजेच्या सुमारास घडली. बोदवड पोलीस स्टेशनला घटनेची नोंद घेण्याचे काम सुरू होते.
मुक्ताईनगरकडे येणाऱ्या भरधाव कंटेनरने नेपानगरकडून (मध्यप्रदेश) बोदवडकडे येणाऱ्या दोन दुचाकीस्वारांना धडक दिली व तो पसार झाला. अपघातात दुचाकीवरील पाचजण जखमी झाले आहेत. यात सुनील भिलाला (२२, नेपानगर) यांच्या डाव्या पायाला दुखापत झाली असून अनिल डोंगरसिंग गिराडे (२२) याच्या हातापायाची बोटे तुटली आहेत. अपघातात अन्य एकजण तसेच मुक्ताईनगर तालुक्यातील सारोळा येथील दोन तरुण जखमी झाले आहेत.
घटनेची माहिती मिळताच नाडगाव येथील तरुणांनी जखमींना तत्काळ वाहनातून बोदवड येथील ग्रामीण रुग्णालयात दाखल केले. सारोळा येथील दोन तरुणांना परस्पर मुक्ताईनगरच्या उप जिल्हा रुग्णालयात हलवण्यात आले आहे. प्राथमिक उपचारानंतर जळगाव जिल्हा रुग्णालयात हलविण्यात आले.
