जळगाव शहरातील मेहरुणमधील जोशीवाड्यात घडली घटना
जळगाव (प्रतिनिधी) : लहान मुलांकडून रथावर पुष्पवृष्टी केली जात होती. दरम्यान, दोन गटात फुले फेकण्यासह फटाके फोडण्यावरुन वाद होवून दोन गटात तुफान दगडफेक झाली. ही घटना मंगळवारी सायंकाळी साडेनऊ वाजेच्या सुमारास मेहरुण परिसरातील जोशीवाडा परिसरात घडली. यामध्ये एक जण जखमी झाला. एमआयडीसी पोलिसांनी वेळीच घटनास्थळी धाव घेत जमावावर नियंत्रण मिळविल्यानंतर परिसरात तणावाचे वातावरण निर्माण झाले होते.
शहरातील मेहरुण परिसरातील छत्रपती शिवाजी महाराज चौकातील काही तरुणांनी मंगळवारी सायंकाळच्या सुमारास रथ काढला होता. या रथाची परिसरातून मिरवणुक काढत त्यांनी पुष्पवृष्टी करीत ते वाजत गाजत जात होते. यावेळी जोशी वाडा परिसरातील गल्लीतून ते जात असतांना काही जणांच्या अंगावर फुले पडली. यामुळे त्यांच्यात शाब्दिक वाद झाला. मात्र दोन्ही गटातील वाद वाढतच जात असल्याने दोन्ही गटांकडून एकमेकांवर तुफान दगडफेक करण्यास सुरुवात केली. (केसीएन)काही कळण्याच्या आत दोन्ही गट समोरासमोर येवून दगडफेक करीत असल्याने परिसरात पळापळ सुरु झाली. दरम्यान, पोलीस अधीक्षक डॉ. महेश्वर रेड्डी यांनी घटनास्थळी भेट देवून आढावा घेत सुचना दिल्या.
दगडफेकीमध्ये रॅलीतील निशू समाधान नाईक याला दगड लागून तो जखमी झाला असून एका महिलेच्या घराचा दरवाजा आणि पाण्याची टाकी फुटून नुकसान झाले. (केसीएन)तसेच परिसरात दगड विटांसह फरशांची तुकड्यांचा खच जमा झाला होता. दरम्यान, जखमी तक्रार देण्यासाठी पोलीस ठाण्यात दाखल झाला होता. दगडफेकीची माहिती मिळताच एमआयडीसी पोलीस ठाण्याचे पोलीस निरीक्षक दत्तात्रय निकम यांच्यासह सहाय्यक पोलीस निरीक्षक अनिल वाघ, पोलीस उपनिरीक्षक शरद बागल, दत्तात्रय यांच्यासह गुन्हे शोध पथकातील कर्मचाऱ्यांसह एलसीबीच्या पथकाने घटनास्थळी धाव घेत त्यांनी दोन्ही गटातील जमावावर नियंत्रण मिळवले.
