सुशिक्षित उमेदवाराला निवडून द्या, यावर दिला जातोय भर
जळगांव (प्रतिनिधी) : विधानसभेत प्रतिनिधित्व करणारे आमदार सुशिक्षित असणे किती गरजेचे आहे, हे समाजाला पटवून देण्यासाठी महाराष्ट्र नवनिर्माण सेनेचे अधिकृत उमेदवार डॉ. अनुज पाटील यांच्या प्रचाराच्या माध्यमातून जळगाव शहरात विविध ठिकाणी जनजागृती अभियान राबवले जात आहे. शिक्षण, जागरूकता आणि समाज सुधारणा या उद्दिष्टांच्या दिशेने काम करणाऱ्या डॉ.अनुज पाटील यांच्या प्रचारात जनजागृतीचे स्वरूप वेगळे आणि प्रभावी आहे.
सुशिक्षित प्रतिनिधीमुळे लोकांच्या समस्या समजून घेतल्या जातील, त्यांवर प्रभावी उपाययोजना केल्या जातील आणि समाजाला दिशा मिळेल, असे या जनजागृती अभियानात ठळकपणे अधोरेखित केले जात आहे. यासाठी शहरातील विविध ठिकाणी पथनाट्याचे आयोजन करण्यात आले आहे. प्रत्येक पथनाट्यातून मतदारांपर्यंत एक संदेश पोहोचवण्याचा प्रयत्न केला जात आहे.
शिक्षित लोकप्रतिनिधी म्हणजेच पुढील पिढीचे उज्ज्वल भविष्य.या पथनाट्यांमध्ये डॉ. अनुज पाटील यांच्या कार्याचे आणि दृष्टिकोनाचे प्रतिबिंब उमटवले जात आहे. शिक्षणाच्या महत्त्वाची जाणीव करून देत, प्रत्येक नागरिकाला आपला मतदानाचा हक्क सुशिक्षित उमेदवारासाठीच वापरण्याचे आवाहन करण्यात येत आहे. पथनाट्यातून युवकांमध्ये नेतृत्व विकासाची प्रेरणा मिळावी, समाजातील सुधारणा आणि पारदर्शकता यावर भर देण्यात येत आहे.
