जळगाव तालुक्यातील कुसुंबा, मोहाडी शिवारातील घटना
जळगाव (प्रतिनिधी) :- विविध प्रकारचे चोरटे आजवर दिसून आले आहेत. मात्र चक्क मोबाईल वरील टॉवर चोरून नेत त्याची परजिल्ह्यात विक्री केल्याची धक्कादायक घटना जळगाव तालुक्यातील कुसुंबा व मोहाडी शिवारात घडली आहे. मोबाईल टॉवरवरील फाईव्ह जीचे मॉडेल पुणे येथे विक्री केल्याप्रकरणी एमआयडीसी पोलिस ठाण्यात तिघांविरोधात गुन्हा दाखल करण्यात आला आहे.
जळगाव शहरातील निमखेडी शिवारातील शिवधाम मंदिराजवळ रविंद्र अरविंद पाटील (वय ४५) हे राहत असून खासगी नोकरी करतात. दि. १ ऑगस्ट रोजी जळगाव तालुक्यातील कुसुंबा शिवारातील मोबाईल टॉवरवरुन मध्यरात्री साडेबारा वाजेच्या सुमारास तर २८ सप्टेंबर रोजी मध्यरात्री अडीच वाजेच्या सुमारास एका खासगी मोबाईल कंपनीच्या टॉवरवर लावलेले दोन मॉडेल चोरीस गेले होते.
याप्रकरणी संशयित परवेज उर्फ बबलू महेमुद पिंजारी (वय २९, रा. खंडेराव नगर, पिंप्राळा) व समीर शेख शाकीर शेख (वय २४, रा. आझादनगर, पिंप्राळा हुडको) यांनी चोरुन नेल्याचे पोलीस तपासात उघड झाले. ते मॉडेल या चोरट्यांनी पुणे येथील पिसोळी येथील रिजवान निसार अहमद अली (वय ३२) याला विक्री केल्याचे उघड झाले आहे. याप्रकरणी तिघांविरुद्ध एमआयडीसी पोलिसात गुन्हा दाखल करण्यात आला आहे. पुढील तपास पोलीस उपनिरीक्षक शरद बागल हे करीत आहे.
