सोयगाव तालुक्यातील वरठाण येथे ग्रामस्थांमध्ये भीतीचे वातावरण
सोयगाव (प्रतिनिधी) : तालुक्यातील वरठाण व बनोटी तांडा या गावात पिसाळलेल्या कुत्र्याने आठ जणांना चावा घेत जखमी केले. शुक्रवार दिनांक १३ रोजी सकाळी आठ वाजता हा प्रकार घडल्यानंतर परिसरात भिती पसरली. जखमींवर जळगाव येथील शासकीय रुग्णालयात उपचार करण्यात आले आहे.
वरठाण व बनोटीतांडा येथे सकाळी पिसाळलेल्या कुत्र्यांनी दोन तास धुमाकूळ घातला. रस्त्याने येणाऱ्या जाणाऱ्यांना त्यांनी लक्ष्य केले. तय्यब कुरेशी (वय ४७), भास्कर संसारे (वय ५५), कौतिक संसारे (वय ६५), आशाबाई सांडू संसारे (वय ३८), पमाबाई होना खैरनार (वय ४२), प्रियंका भुजंगराव फासे (वय २३), रा. सर्व वरठाण तसेच बनोटीतांडा येथील नीलेश किरण पवार (वय ०९), अनिता भदू जाधव (वय १८) असे ८ जणांचे हातापायाला, बोटांना चावा घेत जखमी केले.
जखमींवर बनोटी प्राथमिक आरोग्य केंद्रात प्राथमिक उपचार केल्यानंतर जळगाव येथील शासकीय वैद्यकीय महाविद्यालय व रुग्णालयात अधिकच्या उपचारार्थ हलविण्यात आले. बनोटीतांडा येथील दोन जणांना छत्रपती संभाजीनगर येथील घाटीत दाखल करण्यात आले. गेल्या अनेक महिन्यांपासून मोकाट कुत्र्यांचा त्रास सुरू आहे. या कुत्र्यांचा त्वरीत बंदोबस्त करण्यात यावा, अशी मागणी परिसरातून होत आहे.
