एरंडोल शहरात १ लाख ३१ हजाराचा मुद्देमाल जप्त
एरंडोल (प्रतिनिधी) : नाशिकच्या विशेष पोलीस महानिरीक्षक पथकाने येथील मयूरी हॉटेलमागे शेडमध्ये सुरू असलेल्या जुगार अड्ड्यावर दिनांक ८ सप्टेंबर रोजी संध्याकाळी धाड टाकून जुगार खेळताना ८ संशयित आरोपींना रंगेहाथ पकडण्यात आले. यात १ लाख ३१ हजारांसह जुगाराचे साहित्य जप्त करण्यात आले. या कारवाईमुळे खळबळ उडाली आहे.
या कारवाईत १ लाख ३१ हजार १४० रूपये रोख, तीन पत्त्यांचे कॅट, २० हजाराचे मोबाईल व जुगाराचे साहित्य असा एकूण १ लाख ५१ हजार ६४० रूपयाचा मुद्देमाल जप्त करण्यात आला. या कारवाईत एरंडोल येथील बबलू चेतराम चौधरी (वय ४०), माळीवाड्यातील विकास प्रेमराज महाजन (वय ३२), गणेश बाबुलाल चौधरी (वय ५५), धनराज अशोक पाटील (वय ४०), संदीप भानुदास जाधव (वय ३९), सतीश चेतराम चौधरी (वय २३) यांच्यासह चाळीसगाव तालुक्यातील कळमडू येथील चंद्रकांत सतिलाल वाघ (वय ३९) व अमळनेर येथील दीपक प्रभु लोहिरे (वय ४७) यांना पोलिसांनी ताब्यात घेतले आहे.
पोलीस कारवाई पाहून काहींनी पलायन केले. या वेळी पकडलेल्या संशयितांनी आरडाओरडा करून पोलिसांशी हुज्जत घातली. त्यानंतर एरंडोल पो. नि. सतीश गोराडे सहकाऱ्यांसह तत्काळ घटनास्थळी दाखल झाले व परिस्थिती नियंत्रणात आणली. या वेळी संशयितांकडे जुगाराचे साहित्य, रोख रक्कम व मोवाईल मिळाले. विजय बिलघे, तुषार पाटील, विक्रांत मांगडे, प्रमोद मंडलिक, स्वप्निल माळी, सुरेश टोंगारे, तसेच पारोळा पोलिस ठाण्याचे पो.नि. सुनील पवार, हिरालाल पाटील, अभिजित पाटील, अनिल राठोड, आकाश माळी यांनी ही कारवाई केली.
दरम्यान, जुगार अड्ड्याचे मालक बबलू चेतराम चौधरी उर्फ बबलू पहिलवान हे त्यांच्या हस्तकाकरवी जुगार खेळवत आहेत, अशी गुप्त बातमी पोलिसांना मिळाल्यावरून ही कारवाई करण्यात आली. या प्रकरणी प्रमोद मंडलिक यांच्या फिर्यादीवरुन एरंडोल पोलीस ठाण्यात गुन्हा दाखल करण्यात आला आहे.
