जळगाव तालुक्यातील आसोदा ते भादली दरम्यानची घटना
जळगाव (प्रतिनिधी) : तालुक्यातील आसोदा ते भादली दरम्यान भुसावळ रेल्वे हॉस्पिटल येथील कक्षसेवकाचा कर्तव्य आटोपून घरी परतत असताना रेल्वेतून पडून दुर्दैवी मृत्यू झाल्याची घटना शुक्रवार दि. २ ऑगस्ट रोजी सकाळी ९ वाजेच्या सुमारास उघडकीस आली आहे. नशिराबाद पोलीस स्टेशनला अकस्मात मृत्यूची नोंद करण्यात आली आहे.
चंद्रकांत आनंदा मराठे (वय ५६, रा.राधाकृष्ण नगर, जळगाव) असे मयत कर्मचाऱ्याचे नाव आहे. त्यांच्या पश्चात पत्नी, दोन मुले, दोन मुली असा परिवार आहे. (केसीएन)ते भुसावळ येथील रेल्वे हॉस्पिटलमध्ये कक्ष सेवक म्हणून कर्तव्य बजावत होते. दरम्यान गुरुवारी दि. १ ऑगस्ट रोजी दुपारी ३ वाजेला कर्तव्य संपल्यावर ते जळगाव येथे घरी जाण्यासाठी निघाले असताना आसोदा ते भादली दरम्यान रेल्वेतून पडून गंभीर जखमी झाले. दरम्यान, दुसरीकडे चंद्रकांत मराठे यांच्या नातेवाईकांनी ते संध्याकाळपर्यंत घरी न आल्यामुळे त्यांचा शोधाशोध सुरू केला.
मात्र ते मिळून आले नव्हते. भुसावळ रेल्वे स्टेशन वरून ते रेल्वेत बसून घरी जाताना सीसीटीव्ही कॅमेरात दिसून आले होते. दरम्यान, नशिराबाद पोलीस स्टेशनला शुक्रवारी २ ऑगस्ट रोजी रेल्वे विभागाकडून माहिती मिळाली. (केसीएन)त्यानुसार सकाळी साडेनऊ वाजता स्टेशनचे कर्मचारी सागर भिडे व त्यांचे सहकारी आसोदा ते भादली दरम्यान खांबा क्रमांक ४२७/२४ ते २६ दरम्यान घटनास्थळी पोहोचले. शासकीय वैद्यकीय महाविद्यालय व रुग्णालय, जळगाव येथे आणण्यात आला. या ठिकाणी वैद्यकीय अधिकारी डॉ. अश्विन देवचे यांनी त्यांना तपासून मयत घोषित केले.
दरम्यान घटनास्थळावर चंद्रकांत मराठे यांचा मोबाईल आढळून आला. त्यावरून नशिराबाद पोलिसांनी चंद्रकांत मराठे यांची ओळख पटवली. नातेवाईकांना माहिती मिळताच त्यांनी रुग्णालयात धाव घेतली. यावेळी त्यांनी एकच आक्रोश केला होता. घटनेप्रकरणी नशिराबाद पोलीस स्टेशनला अकस्मात मृत्यूची नोंद करण्यात आली आहे.
