जळगाव तालुक्यातील सुनसगाव येथील घटना ; जखमींमध्ये बोदवड “विकासो” चे कर्मचाऱ्यांचा समावेश
जळगाव (प्रतिनिधी) : तालुक्यातील सुनसगाव येथे भरधाव डंपर आणि ओमनी कारचा शुक्रवार दि. २ ऑगस्ट रोजी सकाळी ११ वाजेच्या सुमारास भीषण अपघात झाला. या अपघातामध्ये ५ जण जखमी झाले आहेत. घटनेची माहिती पोलीस घेत आहेत.
बोदवड येथील विविध कार्यकारी सोसायटीचे कर्मचारी खाजगी ओमनी वाहनाने शुक्रवार दिनांक २ ऑगस्ट रोजी सकाळी ९ वाजता जळगाव येथे काही कामानिमित्त येत होते. त्यावेळेला सूनसगाव येथे ओमनी कार आली असताना समोरून येणाऱ्या भरधाव डंपरने त्यांना जबर धडक दिली. या भीषण अपघातामध्ये ओमनी कारमधील चार जण गंभीर तर एक जण किरकोळ जण जखमी झाले. (केसीएन) नागरिकांनी त्यांना तातडीने जळगावच्या शासकीय वैद्यकीय महाविद्यालय व रुग्णालयात उपचारासाठी दाखल केले.
घटनेमध्ये विविध कार्यकारी सोसायटीचे गट सचिव सुभाष प्रभाकर बावस्कर (वय ५२), कारकून रामदास देवराम मोरे (वय ५०), सोसायटीचे सेल्समन प्रकाश निना सोनार (वय ४०) यांचेसह चालक कैलास पुंडलिक सुशीर (वय ५०) हे गंभीर जखमी झाले आहेत तर नीना कैलास सुशीर (वय ३१) या तरुणाला किरकोळ मार लागला आहे.(केसीएन)घटनेची माहिती मिळताच राष्ट्रवादी काँग्रेस पक्ष शरद पवार गटाचे जिल्हाध्यक्ष अँड.रवींद्र पाटील यांनी त्यांच्या कार्यकर्त्यांसह रुग्णालयात धाव घेऊन जखमींची विचारपूस केली.
दरम्यान, पोलिसांना माहिती मिळताच त्यांनी घटनास्थळी धाव घेतली होती. तर काही पोलिसांनी रुग्णालयात येऊन जखमींची माहिती घेतली. दरम्यान या घटनेप्रकरणी, नशिराबाद पोलीस स्टेशनला शेवटचे वृत्त हाती आले तोपर्यंत कुठलीही नोंद नव्हती.