अमळनेर तालुक्यातील वावडे येथील घटना
अमळनेर (जळगाव) : शेतात फवारणी करत असताना विहिरीत टाकलेल्या मोटारीच्या वायरला स्पर्श झाल्याने विजेचा धक्का लागून तरुणाचा मृत्यू झाला. सदरची घटना अमळनेर तालुक्यातील वावडे या गाव शिवारात दिनांक ३१ जुलैला दुपारच्या सुमारास घडली. या प्रकरणी मारवाड पोलीस स्टेशनला अकस्मात मृत्यूची नोंद करण्यात आली आहे.
गौरव दीपक माळी (वय २०, रा.वावडे ता.अमळनेर) असे मृत तरुणाचे नाव आहे. गावात तो त्याच्या परिवारासह राहत होता. गौरव हा धुळे येथे ‘बीसीए’चे शिक्षण घेत होता व सुट्टीवर घरी आलेला असता ही दुर्दैवी घटना घडली. (केसीएन) शेतात वडिलांना मदत म्हणून गौरव हा फवारणीच्या कामासाठी गेला होता. फवारणी करताना विहिरीवर लावलेल्या मोटारच्या वायरचा स्पर्श त्याच्या मानेला झाल्याने त्याला विजेचा जोरदार धक्का बसला. पावसामुळे जमीन देखील ओली असल्याने विद्युत प्रवाह संपूर्ण शरीरात गेला.
घटना घडली यावेळी त्याचे वडील देखील शेतातच होते. घटनेनंतर त्याचे वडील व गावातील लोकांनी त्याला उपचारासाठी अमळनेर ग्रामीण रुग्णालयात नेले असता डॉक्टरांनी तपासून त्यास मृत घोषित केले. यावेळी कुटुंबीयांनी एकच आक्रोश केला. या प्रकरणी मारवड पोलिसात अकस्मात मृत्यूची नोंद करण्यात आली आहे.
