फायनान्स संस्थेतील कर्मचाऱ्यांच्या चातुर्यामुळे अडकले पोलीस बेडीत
जळगाव शहरातील घटना
जळगाव (प्रतिनिधी) : जळगाव शहर पोलिसांनी शहरातील मनप्पुरम फायनान्स लिमीटेड या संस्थेत बनावट सोने देऊन पैसे उकळणाऱ्या चौघांना अटक केली आहे. जळगाव आणि आग्रा येथील संशयीत आरोपी फायनान्स संस्थेतील कर्मचाऱ्यांच्या चातुर्यामुळे पोलीस बेडीत अडकले आहेत. त्यांच्यावर गुन्हा दाखल करण्यात आला आहे. त्यांच्याकडून इतर जिल्ह्यातील आणखी गुन्हे उघड होण्याची शक्यता आहे.
जळगावातील मनप्पुरम फायनान्स लिमीटेड या खाजगी संस्थेत हर्षल रविंद्र पेटकर (वय २३ वर्षे, रा. नवीपेठ, जळगाव) हे व्यवस्थापक आहेत. मनप्पुरम फायनान्स लिमीटेड संस्थेचे नवीपेठ परिसरातील कुकरेजा कॉम्प्लेक्समध्ये कार्यालय आहे. सोने तारण ठेवून कर्ज देण्याचे काम याठिकाणी होत असते. मनप्पुरम फायनान्स लिमीटेड संस्थेत दि.१ जून रोजी बँकेत सायंकाळी ४.३५ च्या सुमारास संशयित आरोपी जोराराम रानुराम बिस्नोई (वय ५० वर्ष, रा. नशिराबाद बस स्टॅन्ड जवळ, ता. जि. जळगांव, मुळ गाव दोडासर ता.जि.फलौदी, राजस्थान), खेतेंद्र ओमप्रकाश शर्मा (वय ३१ वर्षे, रा. बालाजीपेठ जळगाव, मुळ रा. रामबाग, आग्रा, उत्तर प्रदेश) यांनी बनावट, खोटे सोन्याचा मुलामा चढवलेले दागिने खरे आहेत म्हणुन गहाण ठेवले.
त्याबदल्यात कर्जरुपी २ लाख ६६ हजार रुपये स्वतःच्या फायद्याकरीता लबाडीने मिळविले होते. दि.५ जून रोजी तशाच प्रकारचे दागिने घेऊन दोन इसम आल्याने ते पाहून व्यवस्थापक हर्षल पेटकर चक्रावले. तपासणी केली असता ते सोने बनावट असल्याचे त्यांचा लक्षात आले, त्यामुळे त्यांनी अगोदर सोने ठेवलेल्या दोघांना ज्यादा ४० हजार देण्याचे आमीष देत बोलावून घेतले. बुधवारी दुपारी ११ वाजेच्या सुमारास जोराराम रानुराम बिस्नोई, खेतेंद्र ओमप्रकाश शर्मा हे वाढीव रक्कम घेण्यासाठी आले होते. बँकेचे सहकारी आणि व्यवस्थापक यांनी दोघांना कार्यालयात थांबवले आणि शहर पोलीस स्टेशनच्या कर्मचाऱ्यांना बोलावले.
शहर पोलिसांनी धाव घेत या दोघांना ताब्यात घेतले. त्यांची अधिक चौकशी करता आणखी दोघांची नावे समजली. एका लॉजमध्ये थांबलेले सतिषचंद शोवरन सिंग (वय ३२ वर्ष, रा. आग्रा, उत्तरप्रदेश) आणि संतोष मुन्नालाल कुशवाह (वय ३५ वर्ष, रा. आग्रा, उत्तरप्रदेश) यांना ताब्यात घेतले. बँकेचे व्यवस्थापक हर्षल रविंद्र पेटकर यांनी दिलेल्या फिर्यादीवरून जळगांव शहर पो.स्टे.ला गुन्हा दाखल करण्यात आला आहे. संशयित आरोपी जोराराम रानुराम बिस्नोई, खेतेंद्र ओमप्रकाश शर्मा, सतिषचंद शोवरन सिंग, संतोष मुन्नालाल कुशवाह यांच्याविरुद्ध गुन्हा दाखल करण्यात आला आहे. तपास हवालदार रविद्र सोनार करीत आहे.
